Меси е прототипот на постојаност, откако повеќе од една деценија постигнува по повеќе од 40 гола годишно и повеќе од 50 во девет од минатите 10 години. Тој им се придружи на фудбалерите што постигнале барем 700 гола во кариерата, Бичан, Ромарио, Пеле, Пушкаш, Милер и К. Роналдо
ФУДБАЛ
Лионел Меси го постигна 700-от гол во кариерата во сите конкуренции на мечот Барселона – Атлетико, 2-2, од фудбалското првенство на Шпанија. За Меси голот од пенал во стилот на славниот Антонин Паненка во 50. минута беше 22-от сезонава, 630-от за Барселона на 724 одиграни натпревари. Преостанатите 70 гола, Меси ги постигна во дресот на Аргентина.
Со тоа Меси влезе во елитниот „клуб 700“, во кој сега се седум фудбалери, според податоците за официјални мечеви на Фондацијата за фудбалска статистика (РСССФ), на која се повикува „Би-би-си“. Рекордер со 805 погодоци е Чехот/Австриец Јозеф Бичан, кој настапувал за повеќе австриски и чешки клубови во периодот од 1930 до 1955 година. Зад него се двајца Бразилци, Ромарио со 772 и Пеле со 767 гола, потоа се Унгарецот Ференц Пушкаш со 746, Германецот Герд Милер со 735, а шести е Португалецот Кристијано Роналдо со 728 гола.
Меси е прототип на постојаност. Тој во претходните 11 години постигнува повеќе од 40 гола за Барселона и за Аргентина и повеќе од 50 во девет од минатите 10 години. Годинава тој постигна 11 гола, според статистичките податоци на „Опта“ што ги користи „Би-би-си“. Од 40-те тима против кои играл во шпанската Ла лига, Меси нема постигнато гол против Xерез, Мурсија и против Кадиз, а најмногу има против Севилја (37), Атлетико Мадрид (32) итн.
Повеќето голови, 582, Меси ги постигна со левата нога, 92 со десната, а 24 со глава, потоа 52 гола од слободен удар, 90 од белата точка, 580 постигна со шут од шеснаесетникот, а 120 однадвор од 16-те метри.
ПОВЕЌЕ ОД 700 ГОЛА ВО КАРИЕРАТА
ФУДБАЛЕР ГОЛОВИ ПЕРИОД
Јозеф Бичан 805 1931-1955
Ромарио 772 1985-2007
Пеле 767 1957-1977
Ференц Пушкаш 746 1943-1966
Герд Милер 735 1962-1981
Кристијано Роналдо 728 2002-
Лионел Меси 700 2005-
Извор: „Би-би-си“
