Кога температурите се екстремно високи, вашето куче е изложено на ризик од дехидрираност и прегревање. Без разлика дали имате куче или планирате да земете, корисно е да го освежите знаењето и да се потсетите на знаците што покажуваат дека вашиот миленик се прегреал. Воспалени очи, сува муцка и уста се знаци на дехидрација. Можете исто така да ја проверите еластичноста на кожата на вашето куче или колку време е потребно за кожата да се врати во првобитната состојба кога ќе ја повлечете. Колку подолго време треба кожата да се врати во првобитната состојба, толку кучето е повеќе дехидрирано.
За разлика од луѓето, кучињата не може да се потпрат на потта за да се разладат, па тешко дишат за да ја намалат сопствената температура. Ако отежнатото дишење е придружено со дезориентираност и одбивање храна, тоа е знак дека кучето се прегреало и дека треба да му помогнете. Посериозни знаци на прегревање се колапс, грчеви, светлоцрвени или сини непца, повраќање и дијареја.
Исто така, важно е за која раса станува збор. Расите со рамна муцка, како булдози и мопсови, потешко се ладат од другите. Потребно им е посебно внимание. Покрај тоа, пред летната фризура треба да се консултирате со ветеринар, бидејќи долгото влакно е заштита од прегревање за одредени раси, иако луѓето може да мислат дека им е жешко поради крзното.
Доколку се забележат доцна, дехидрираноста и прегревањето може да бидат опасни, па затоа треба да внимавате на кучињата кога сте надвор и е многу топло. Бидете сигурни дека вашето куче пие многу вода и ако почувствувате дека му е жешко, префрлете се под сенка. Ако имате место за капење во близина, охрабрете го да се разлади во водата. Ако забележите посериозни знаци на дехидрација, навлажнете го вашето куче со ладна вода и веднаш повикајте го вашиот ветеринар, пишува „Вомансдеј“.
