Техно
Компанијата „Епл“ го освежува својот најповолен ајфон на секои две години, а бидејќи видовме еден минатата година, следниот се очекуваше во 2024 година, меѓутоа ништо нема да излезе од тоа. Познатиот аналитичар Минг-Чи Куо тврди дека „Епл“ го завршил „експериментот ајфон СЕ“ и дека плановите за производство и продажба на новиот модел во 2024 година се откажани.
Оваа одлука е поврзана и со долго шпекулираниот 5Г-процесор на „Епл“, кој е „зад аголот“ со години. Овој процесор требаше да го користи ајфон СЕ и со тоа да стане „опсег на тестирање“. Кога работите би тргнале наопаку, штетата би била ограничена, бидејќи станува збор за најевтиниот модел, а не поскапиот. Од друга страна, доколку планот беше успешен, процесорот имаше потенцијал да биде во серијата ајфон 16 во 2024 година.
Сепак, откажувањето на ајфон СЕ 4 го наметнува прашањето дали перформансите на процесорот на „Епл“ ќе се совпаѓаат со оние на „Квалком“. Затоа, шансите процесорот Квалком да го напојува ајфон 16 дополнително се зголемија, што е спротивно на предвидувањата дека „Квалком“ ќе почне да губи нарачки поврзани со ајфон во 2024 година.
Со ваквиот развој, „Квалком“ би продолжил да му испорачува процесори на „Епл“ најмалку до 2025 година, што значи продолжување на неговата доминација на глобалниот пазар за процесори наменети за мобилни уреди. Причината за откажувањето на ајфон СЕ 4 наводно се крие во слабата продажба на претходните модели.
