Нега и убавина
Долго време гуаша е една од најбараните алатки што се користат во негата на кожата за нејзино затегнување и подмладување. Експертите откриваат колку навистина е ефикасна. Оваа древна кинеска масажа на кожата стана вирална сензација. Гуаша е дел од традиционалната кинеска медицина илјадници години. Таа вклучува алатки како рог, камен и жад за масажа на кожата. Оваа алатка е толку популарна што многумина тврдат дека може да ги замени ботоксот и хијалуронските филери.
Масажата на лицето со гуаша вклучува нежно стружење на кожата со цврсти движења нагоре. Тоа го буди лимфниот систем и ја зголемува циркулацијата на крвта. Исто така поттикнува елиминација на токсините и вишокот течности за да се намали надуеноста. Притисокот што се применува на кожата ги олабавува затегнатите мускули, слично како масажа на вратот или рамената.
Иако гуаша може да го подобри и изгледот на брчките и на лицето што старее, таа нема магично да ги избрише брчките. Гуаша се потпира на притисок и масажа за да тече застоената крв и да ја ревитализира кожата. Ботоксот, пак, користи невротоксини, кои кога се инјектираат ги блокираат сигналите од нервите до мускулите што се потребни за контракција. Намалувањето или елиминирањето на овие контракции и изрази на лицето ги омекнува ситните линии и брчки. Иако гуаша е поприродна алтернатива на филерите и ботоксот, сепак резултатите никогаш нема да бидат идентични со она што може да се постигне со инјекција. Дури и ако следите конзистентна рутина со гуаша, таа нема да ги избрише ситните линии и брчки со иста ефикасност како ботоксот и филерите.
