Хумана страница
Во саботата напладне, во Скопје, беше претставена инклузивната сликовница „Другарите од Зоолошката градина“ на авторката Гордана Симоновска-Момироска. Минатата година таа нѐ израдува со „Новогодишна приказна“, која е преведена и на албански јазик, и со сликовницата „Буква по буква азбука“.
Овие книги се многу значајни, бидејќи не само што ќе им го разубават детството на многу момчиња и девојчиња туку затоа што се преведени и на Брајово писмо, со што се достапни и до децата, но и возрасните со оштетен вид.
Издавач е здружението на граѓани „Свет на различни, а еднакви“, а книгата е дел од иницијативата „Да читаме без дискриминација“. Убавите илустрации се дело на Наско Џорлев.
Неговиот татко, познатиот македонски музичар Зоран Џорлев, заедно со рецензентот, писателот за деца и млади Горјан Петрвски, исто така од самите почетоци беше дел од овој проект, но тој, за жал, веќе една година не е со нас. Тој требаше да напише и музика за неколку песнички, но неговата хумана мисија, ете, ја продолжува неговиот син Наско Џорлев, кој и лани во „Новогодишна приказна“ со прекрасни илустрации ги разубави страниците на книгата.
Печатењето со видно писмо беше во печатницата „Европа 92“, а печатењето на Брајово писмо е дело на Здружението на слепи лица од Велес. И токму дел од средствата од продажбата на сликовницата се наменети за неговите членови.
Се разбира, промоцијата се одржа на најсоодветното место во Скопската зоолошка градина, која широко ги отвори вратите за овој проект и, како што рече директорот Кристијан Стаменов, така ќе биде и во иднина.
– Ние сме прва дигитализирана зоолошка градина на Балканот и имаме апликации за слепи лица на нашата веб-страница, а, еве, сега драго ни е што и на овој начин животните ќе им бидат доближени на децата со оштетен вид – вели Тина Мицковска, заменик-директорка на Зоолошката градина во Скопје.
На промоцијата, и покрај студеното, но сончево време, присуствуваа голем број дечиња со нивните родители, а стихови од сликовницата читаа деца со оштетен вид и членовите на „Детското драмско студио на Снешка“, а убавата атмосфера беше збогатена и со присуството на Дедо Мраз.
– Многу сум горда на целиот тим со кој соработував, а цело време до мене е писателот за деца и млади Горјан Петревски. Преку сликовницата „Другарите од Зоолошка градина“ и дечињата со оштетен вид ќе имаат можност да читаат сами, но и нивните баби и дедовци што имаат проблеми со видот ќе им читаат на внуците, а другите дечиња ќе имаат можност да се запознаат со Брајовото писмо и начинот на кој се описменуваат слабовидните и слепи лица. Проектот не застанува тука, бидејќи планираме издавање на уште многу вакви дела во иднина – рече авторката Гордана Симоновска-Момироска.
А Горјан Петревски во својата рецензија за сликовницата ќе рече:
„’Другарите од Зоолошката градина‘ може да се чита заедно, со родители и деца, но и со внучиња, со баби и дедовци. За секое животно по стих-два, а најмногу до строфа, читливо и блиско и за учење наизуст. Така е со убавите стихови. Тие се пишувани не само за едно читање, туку и за препрочитување, сѐ додека не ни останат во паметењето, никогаш да не се заборават…“.
За леопардот, зебрата, слонот….
Од далечна земја
донесен за нас,
леопардот шарен
тука најде спас.
Ене ја и зебрата,
таа не е сама,
со неа престојува
убавата лама.
Еленот ја чува
малечката срна,
а сосетка нивна
е овцата црна.
Со крената сурла
тежок еден тон,
исправен е пред нас
големиот слон…
