Петнаесет македонски средношколци и студенти од денеска во наредниот период се дел од меѓународното жири на најголемиот филмски фестивал за деца на светот – „Џифони“, кој се одржува во Италија. Под мотото „Восклик на радоста“, оваа година фестивалот „Џифони“ постепено се враќа во киносалите. Така, на 3.000 учесници во живо ќе им се придружат уште 2.000 учесници поврзани онлајн од Италија и од други земји во Европа.
Македонската група повторно е најмногубројна: по пет претставници во секоја од трите старосни категории ја следат програмата од просториите на „Џифони Македонија“, во согласност со протоколите за безбедност. Тие заедно со своите врсници во киносалите во Џифони и онлајн ги гледаат филмовите на програмата, дискутираат за нив со гостите и ќе гласаат за своите фаворити.
Повторно посветен на јубилејот – 50 години од првото издание на фестивалот „Џифони“ – кој минатата година не можеше да биде соодветно одбележан, годинашниот настан се одржува под името „Џифони 50 плус“.
