ИНИЦИЈАТИВИ
„Палеографски амбасадори – Меѓународен ден на мајчиниот јазик 2021“ е е-твининг проект на Едита Кевро од Мостар, кој го реализира во соработка со Амела Исановиќ од Шведска. Веќе трeта година проектот опстојува и се реализира на меѓународно ниво. Претходните две години беше награден со европска ознака на квалитет (European Quality Label – EQL), која се доделува од Централната служба за поддршка од Брисел за најквалитетните е- твининг проекти. Идејата е ученици од различни култури заедно да го одбележат 21 Февруари – Меѓународниот ден на мајчиниот јазик.
Календар на активности
По тој повод, оваа година се организирани повеќе предавања-работилници, кои ќе се случуваат до мај 2021.
На 22 февруари предавање – работилница од Амира Турбиќ-Хаџагиќ, докторка по лингвистика и редовна професорка по лингвистика на Филозофскиот факултет на Универзитетот во Тузла, на тема „Босанскиот јазик во раниот среден век“.
На 23 февруари 2021, присуствувавме на предавањето од проф. д-р Мирела Муфтиќ-Омеровиќ од Педагошкиот факултет, Универзитет во Сараево, на темата „Јазична култура и учтивост“.
На 25 февруари работилницата-предавање на Филип Димкоски, поет, преведувач и новинар, насловена „Воздишка низ која сме заплакале“.
– Вечерва сум изморен, но преполнет со радост и задоволство, по моето предавање , по повод Меѓународниот ден на мајчиниот јазик, во рамките на е-твининг програмата. Предавањето што го подготвив носи наслов „Воздишка низ која првпат сме заплакале“, според стиховите на Гане Тодоровски, а имаше цел на наставниците и на учениците од Македонија, а особено од БиХ, Србија и во Хрватска да им го претстави македонскиот јазик. Големиот број позитивни коментари ми се показател дека е сработено добро. Благодарност до наставничката Аида Петровска за поканата, како поет, новинар и преведувач да имам улога на предавач во рамките на овој настан од програмата. Да не заборавам дека со убавите одговори на прашања во врска со јазикот ми помогнаа прекрасните ученици од ООУ „Димитар Миладинов“ од Скопје. – изјави Филип Димкоски веднаш по завршувањето на ова онлајн предавање.
Времеплов на македонската писменост и литература
„Времеплов на македонската писменост и литература за деца и млади“ е четвртото предавање-работилница, спроведено од Ксенија Маказлиева Трајчева, одговорна уредничка на списанијата „Росица“ и „Другарче“, писателка за деца и едукаторка, и од доц. д-р Ана Витанова Рингачева од Филолошкиот факултет при универзитетот „Гоце Делчев“ во Штип.
Оваа година во проектот учествуваат училиштата: ОУ„Рифат Бурџобиќ Тршо“ од Тутин, Србија; ОУ „Страхиња Поповиќ“ од Дворане, Крушевац, Србија; Средното економско училиште од Ниш, Србија; ОУ „Павао Белас“ од Боровец, Хрватска; ОУ„Даљ“ од Даљ, Хрватска; „Адем Бедалли“ од Пегин, Албанија; ООУ „Христо Узунов“ од Охрид, Македонија; ООУ „Димитар Миладинов“ од Скопје, Македонија; ОУ „Станко Ракита“ од Бања Лука, Босна и Херцеговина; ОУ од Доњи Вакуф, Босна и Херцеговина; ОУ „Дрежица“ од Мостар, Босна и Херцеговина и „Спракцентрум“ од Гетеборг, Шведска.
Сите учесници (ученици, наставници, предавачи) со нетрпение ги очекуваат овие средби, кои се исполнети со интересни и несекојдневни содржини, интересни предавачи и многу дружење.
– На сите ни е овозможено да зборуваме на својот мајчин јазик, да го промовираме надвор од границите на сопствените земји, со сета раскош и убавина, со почитување на сите различности и карактеристики на другите јазици. Преку проектните активности што ги реализираме како слободни активности, го истражуваме јазикот. Минатата година проектната тема беше поврзана со темата „Јазици без граници“ на УНЕСКО, по повод Меѓународниот ден на мајчиниот јазик 2020. Тогашните палеографски амбасадори од Македонија, Србија, Хрватска и од Босна и Херцеговина ја истражуваа глаголицата, патуваа низ историјата, пишуваа честитки, решаваа загатки и правеа календари со писмото на нашите предци. Глаголицата ја искористивме и во кодирањето, пишувавме пораки, имиња, закони и поими од физика на глаголица и се забавувавме – велат некои од учесниците.
Незаборавно искуство
Оваа година проектните автори решија да има предавачи надвор од основното и средното образование, па поканија предавачи да ги разубават и збогатат средбите.
– Многу им благодариме на предавачите што нѐ поддржаа во реализацијата на оваа идеја и го прават проектот поинтересен и попривлечен, како за учениците така и за наставниците. Се надевам дека ќе го сместиме во нашата колекција од проекти наградени со европски квалитет (кои досега се педесетина) – велат организаторите.
