Борби за титулата во бокс, најдобрите светски фудбалери и голфери, зимски спортски настани и сега уште Светското фудбалско првенство за мажи – контролата на Саудиска Арабија во спортскиот свет се стега. Запознајте ја жената во центарот на настаните
Откако Австралија стана последната земја што ја повлече својата кандидатура, Саудиска Арабија ќе биде домаќин на Светското првенство во фудбал за мажи во 2034 година без гласови или противење.
Ваквата одлуката беше цреша на врвот на тортата од настани во само еден месец, во која, Кристијано Роналдо, фудбалерот на Ал Наср, го гледаше бокс-мечот во тешка категорија во кој Тајсон Фјури го победи Френсис Нгану во Ријад, а тимот во саудиска сопственост, Њукасл јунајтед, го победи катарскиот Пари Сен Жермен во Лигата на шампионите.
Во ноември, логото на државната саудиска нафтена компанија „Арамко“ ќе биде насекаде низ финалето на Светското првенство во крикет во Ахмедабад, Индија, исто како што е на секоја трка во Формула 1 од Австралија до Азербејџан и на десетици други спортски настани од висок профил низ целиот свет – од борење до коњски трки и е-спорт до едрење.
Навистина, податоците доставени до „Дојче веле“ од данската иницијатива „Играј ја играта“, чија наведена цел е да промовира „демократија, транспарентност и слобода на изразување во светскиот спорт“, откриваат дека „Арамко“ во моментов има најмалку 26 спортски спонзорства.
Само Фондот за јавни инвестиции на Саудиска Арабија (ПИФ), суверениот фонд што го поседува Њукасл и може да се пофали со 137 спонзорства директно или преку неговите подружници, има поголем дел од вкупно 323 саудиски спонзорства во спортот идентификувани во деталната анализа.
И „Арамко“ и ПИФ се во државна сопственост. Ова мешање меѓу државата и спортот е дополнително засилено од голем број клучни поединци, кои имаат огромна дипломатска и политичка моќ од една страна, а од друга страна имаат значајно спортско влијание.
Моќна принцеза
Принцезата Рима бинт Бандар ал Сауд е една од тие луѓе. Член на владејачкото саудиско кралско семејство, принцезата Рима, исто така, има четири официјални, високорангирани титули во спортот, според истражувањето на „Играј ја играта“.
– Таа ја проектира сликата за Саудиска Арабија што престолонаследникот Мохамед бин Салман сака да биде проектирана за Саудиска Арабија. А тоа е: попрогресивна и социјално-либерална, што им дава можности на жените и така натаму. Таа го постигнува тоа и е совршен кандидат – изјави за ДВ Џејмс Дорси, виш соработник на Институтот за Блискиот Исток на Националниот универзитет во Сингапур и автор на „Турбулентниот свет на блискоисточниот фудбал“.
Нејзините улоги вклучуваат и да биде првата жена амбасадор на Саудиска Арабија во САД, место во одборот на саудискиот олимписки комитет – да биде претседателка на женскиот комитет – и членка на Меѓународниот олимписки комитет (ИОК), со многу набљудувачи, кои веруваат Олимпијадата да биде следната спортска цел на Саудиска Арабија.
– Овој тип формални односи меѓу водачот на Националниот олимписки комитет (НОК) и националната влада отвора критични прашања за конфликтот на интереси, прашањата за верност и таканаречената автономија на спортот што олимпиското движење толку жестоко ја промовира. Дали таа ќе биде подготвена и способна ефективно да ја поддржи автономијата на НОК како политичар и владин претставник ако се појави ситуација во која интересите на саудиската влада и на олимпиското движење се разликуваат политички? – вели Станис Елсборг од „Играј ја играта“.
Одржувањето дистанца од политичките интереси се чини дека е најделикатната рамнотежа за принцезата Рима, 48-годишната ќерка на Бандар бин Султан ал Сауд, кој исто така – меѓу другите високи разузнавачки и безбедносни позиции – беше амбасадор на Саудиска Арабија во САД, и Хаифа бинт Фајсал ал Сауд, ќерка на саудиски крал (и премиер) и кралица.
Според тоа, принцезата Рима е и од татковска и од мајчинска страна и правнука на Ибн Сауд, кој се смета за основач на модерна Саудиска Арабија.
Борец за жените
Работата на нејзиниот татко во САД ѝ овозможи на принцезата, едно од осумте деца, образование во Соединетите Американски Држави, каде што дипломирала на универзитетот „Џорџ Вашингтон“.
Пред да ја обезбеди својата висока позиција во спортот, принцезата работеше во малопродажба на високо ниво и беше пофалена за социјалните претпријатија за кои често се тврдеше дека им нудат поголеми шанси на жените во земја општоприфатена да има лошо досие за правата на жените.
Во минатото, принцезата укажа на приемот на жени на некои фудбалски стадиони како знак на напредок.
– Работиме со сите спортски федерации на Саудиска Арабија за да ги вклучиме жените, не само како спортисти туку и на ниво на одборот, на советодавно ниво и во администрацијата. Во нашата заедница сè уште не сме навикнати на родова интеграција и тоа ќе дојде, но треба да внимаваме на себе. Назначувањето жени да внимаваат на другите жени е критично. И тоа ги проширува можностите за работа – рече принцезата за ЕСПН во ретко интервју во 2018 година.
