Меѓународниот тим на научници вели дека има итна потреба од големи промени во начинот на кој се справуваме со дебелината
Повеќе од милијарда луѓе низ светот имаат проблеми со својата тежина, покажуваат глобалните процени објавени во „Лансет“. Ова вклучува околу 880 милиони возрасни и 159 милиони деца, според податоците од 2022 година.
Највисоки стапки се во Тонга и Американска Самоа за жени и Американска Самоа и Науру за мажи, со околу 70-80 отсто од возрасните што живеат со дебелина.
Од околу 190 земји, Обединетото Кралство е рангирано на 55. место за мажи и на 87. место за жени.
Високиот истражувач, професорот Маџид Езати, од Империјалниот колеџ во Лондон, изјави за Би-би-си: „Во многу од овие островски нации сѐ се сведува на достапноста на здрава храна наспроти нездрава храна. Во некои случаи имаше агресивни маркетинг-кампањи за промовирање нездрава храна, додека цената и достапноста на поздрава храна може да бидат попроблематични“.
Професорот Езати, кој со години ги разгледува глобалните податоци, вели дека е изненаден од брзината на промената на сликата – сега има многу повеќе земји што се соочуваат со криза со дебелина, додека бројот на држави каде што луѓето со недоволна тежина се сметаат за најголема загриженост е намален.
Меѓународниот тим на научници вели дека има итна потреба од големи промени во начинот на кој се справуваме со дебелината.
Дебелината може да го зголеми ризикот од развој на многу сериозни здравствени состојби, вклучувајќи срцеви заболувања, дијабетес тип 2 и некои видови рак.
При рангирањето на глобалните стапки на дебелина (процентот на популација класифицирана како дебела), истражувачите открија:
– САД се на 10-то место кај мажите и на 36-то место кај жените;
– Индија е рангирана на 19-то најниско место за жените и 21-то најниско за мажите;
– Кина е 11-та најниска за жените и 52-та најниска за мажите.
Извештајот, кој го опфаќа периодот меѓу 1990 и 2022 година, покажа дека стапката на дебелина е четирикратно зголемена кај децата и адолесцентите. Во меѓувреме, кај возрасните, стапката се зголемила повеќе од двојно кај жените и речиси тројно кај мажите.
Во исто време, процентот на возрасни класифицирани како со недоволна тежина е намален за 50 отсто, но истражувачите нагласуваат дека тој сè уште останува актуелен проблем, особено меѓу најсиромашните заедници.
Генералниот директор на Светската здравствена организација (СЗО), д-р Тедрос Аданом Гебрејесус, рече: „Оваа нова студија ја нагласува важноста за спречување и управување со дебелината од раниот живот до зрелоста, преку исхрана, физичка активност и соодветна грижа“.
Тој додаде дека ќе биде потребна работата на владите и заедниците и „поважно бара соработка од приватниот сектор, кој мора да биде одговорен за здравствените влијанија на нивните производи“.
Коавторот на студијата, д-р Гуха Прадипа, од Фондацијата за истражување на дијабетесот во Мадрас, вели: „Влијанието на прашањата како што се климатските промени, нарушувањата предизвикани од пандемијата на ковид-19 и војната во Украина ризикуваат да ги влошат и стапките на дебелина и стапките на недоволна тежина, со зголемување на сиромаштијата и цената на храната богата со хранливи материи. Дополнителни ефекти од ова се недоволна храна во некои земји и домаќинства, а во други преминување кон помалку здрава храна“.
Мрежата од повеќе од 1.500 истражувачи, кои соработуваат со СЗО, ги анализираше мерењата на висината и тежината на околу 220 милиони луѓе на возраст од пет и повеќе години. Тие користеле мера наречена индекс на телесна маса. Иако признаваат дека ова е несовршена мера за степенот на телесните масти и велат дека некои земји имале подобри податоци од другите, тие тврдат дека тоа е најчесто користена во светот, што ја прави оваа глобална анализа реална.
