Глобалната платформа за финансиски плаќања СВИФТ неодамна објави дека уделот
на јуаните во глобалните плаќања се зголемил пет последователни месеци на 2,77 отсто во јуни, што е највисоко ниво од јануари 2022 година кога уделот беше 3,2 отсто
Реформи на финансискиот пазар и нови платежни опции
Глобализацијата на јуанот зема замав, а таквиот тренд ќе помогне да се олесни понатамошното отворање на Кина и да се поттикнат глобалната трговија и инвестициите на земјата, велат научниците и аналитичарите. Нивните забелешки дојдоа откако глобалната платформа за финансиски плаќања СВИФТ неодамна објави дека уделот на јуаните во глобалните плаќања се зголемил пет последователни месеци на 2,77 отсто во јуни, што е највисоко ниво од јануари 2022 година кога уделот беше 3,2 отсто. Уделот на кинеската валута изнесуваше 2,54 отсто во мај, според СВИФТ, што значи дека таа ја задржа својата позиција како петта најактивна валута за глобални плаќања по вредност. На крајот на 2022 година, индексот на глобализација на јуанот се зголеми за 18,08 отсто во однос на претходната година и одржува долгорочен нагорен тренд, покажа истражувачки извештај објавен од Меѓународниот монетарен институт на универзитетот „Ренмин“ во Кина.
Говорејќи на форумот одржан во Пекинг, Чен Јулу, претседател на универзитетот „Нанкај“, рече дека јуанот добива на интензитет во своето ниво на глобализација и „се очекува да стане најдинамичниот и најперспективен глобален јавен производ со висок квалитет“. Истакнувајќи дека тој стана една од главните меѓународни валути, Чен рече дека се неопходни напори на три фронта за дополнително да се зајакне неговата глобализација.
– Глобалните предизвици, како што се влијанието на пандемијата и геополитичките конфликти, го направија поитен проблемот со недоволното снабдување со меѓународна валута. Глобализацијата на јуанот им нуди на пазарите и економиите во развој нова опција, а исто така го придвижува меѓународниот монетарен систем кон насока на разновидна конкуренција. Ова, пак, ќе ја подобри глобалната економска стабилност – истакна Чен.
Народната банка на Кина неодамна приспособи неколку правила за да им овозможи на бизнисите да позајмуваат повеќе во странство, отворајќи ја вратата за поголем прилив на странски капитал.
Еди Ју, главен извршен директор на Монетарната управа на Хонгконг, рече дека во моментов, бизнисите низ светот бараат диверзификација на ризикот во многу несигурна макроекономска средина, што може да ја зголеми побарувачката за јуанот. Исто така, додека централните банки во големите економии значително ги зголемија каматните стапки, релативно ниските каматни стапки на Кина ја зајакнаа атрактивноста на јуанот како меѓународна валута за финансирање, рече тој.
