Судијата Владимир Панчевски нема кривично да се гони за злоупотреба на службената положба и овластување, односно за тоа што, додека бил претседател, го вработил својот внук како помлад судски соработник во Кривичниот суд, бидејќи делото е застарено, информираат од Обвинителството.
Иницијативата до Обвинителството неодамна ја поднесе антикорупциската комисија, од каде што се посомневаа дека Панчевски извршил посериозно кривично дело од непотизам, бидејќи внукот на Панчевски бил вработен на позицијата помлад судски соработник, иако воопшто не бил пријавен на огласот за вработување објавен од судот.
– Надлежен јавен обвинител од Основното јавно обвинителство – Скопје донесе решение за отфрлање на иницијативата за кривично гонење поднесена од Државната комисија за спречување на корупцијата против три лица за кривично дело – злоупотреба на службената положба и овластување од чл. 353 ст. 1 во врска со чл. 22 од Кривичниот законик. Ваквото решение е донесено бидејќи настапила застареност на кривичното гонење – се вели во информацијата од Обвинителството.
Пријавата се однесува на објавен оглас за вработување на 30 судски службеници во Основниот суд Скопје 1 – Скопје, меѓу кои Државната комисија за спречување на корупцијата утврдила пропусти при вработувањето на едно лице на позицијата помлад судски соработник. Меѓутоа, јавниот обвинител по приемот на иницијативата за кривично гонење, оцени дека постојат околности што го исклучуваат кривичното гонење – застареност.
Имено, постапката за вработување целосно е завршена во мај 2015 година. За кривичното дело – злоупотреба на службената положба и овластување, законодавецот предвидел казна затвор од шест месеци до три години, а во согласност со Кривичниот законик, кривичното гонење не може да се преземе ако поминат три години од извршувањето на кривичното дело за кое според законот може да се изрече затворска казна над една година.
– Со оглед на ова, застареноста на кривичното гонење во предметот настапила најдоцна во мај 2018 година, додека иницијативата за кривично гонење од страна на Државната комисија за спречување корупција е поднесена до Основното јавно обвинителство – Скопје во јуни 2019 година – објаснуваат од Обвинителството.
П.Р.
