Медицински совет
Витамините се клучни за правилното функционирање на нашето тело бидејќи учествуваат во голем број биолошки процеси што ги одржуваат здравјето и виталноста. Тие го зајакнуваат имунитетот, го поддржуваат метаболизмот, ги штитат клетките од оштетување и играат важна улога во одржувањето на кожата, косата, видот и коските. Иако телото ги добива во мали количества од храната, често е неопходно да се посвети дополнително внимание на нивното внесување за да се спречат недостатоците и да се обезбеди оптимално здравје.
– Соодветното внесување витамини може да помогне да се спречат хронични болести, да се подобрат физичките и когнитивните перформанси и целокупното здравје, а сето тоа придонесува за подолг живот – вели д-р Кевин Кук од клиниката „Авива“ во Флорида.
Ризикот од хронични болести се зголемува со возраста, а д-р Кук објасни дека внесувањето еден витамин во доволно количество по 50-та година може да биде многу корисно, иако многу луѓе не го добиваат доволно. Станува збор за витаминот Д.
– Витаминот Д е клучен за одржување на здравјето на коските, зајакнување на имунитетот и намалување на воспалението. Витаминот Д е докажано дека помага при депресија, го зголемува тестостеронот, позитивно влијае на здравјето на мозокот и го подобрува расположението – тврди докторот.
Витаминот Д е од суштинско значење за градење и одржување здрави коски, бидејќи телото може да го апсорбира калциумот, главната компонента на коските, само кога овој витамин е присутен. Дополнително, неговите антиинфламаторни, антиоксидантни и невропротективни својства ги поддржуваат здравјето на имунитетот, мускулната функција и активноста на мозочните клетки. Витаминот Д не е природно присутен во многу намирници, но можете да го добиете од збогатено млеко, збогатени жита и масни риби како лосос, скуша и сардини. Телото исто така произведува витамин Д кога кожата се изложува на директна сончева светлина.
