ФУДБАЛ
- Примивме гол кога натпреварот беше целосно под контрола и навистина верувам дека во тој момент не требаше да играме со 10 фудбалери. Фудбалот треба да се игра 11 против 11, рече Силва, тренер на Фулам
Тренерот на Фулам, Марко Силва, побара преиспитување на правилата за фудбалери на кои им е потребен третман за повреди на главата, откако неговиот тим прими гол кога привремено остана со 10 фудбалери во ремито 1-1 со Кристал палас, во англиската Премиер-лига, пишува „Би-би-си“. Судијата Тони Харингтон го замоли Хорхе Куенка да го напушти теренот за третман откако дефанзивецот на Фулам се чини дека ги стави рацете на лицето откако беше зафатен од рака на Џастин Девени од Палас, по што Куенка беше незадоволен од одлуката на судијата, но го напушти теренот пред да продолжи мечот.
Екипата на Оливер Гласнер поведе со удар со глава на Жан-Филип Матета само неколку секунди подоцна, додека Куенка чекаше покрај аут-линијата, пишува „Би-би-си“. Правилата на Премиер-лигата беа променети пред сезоната 2024/2025 и наведуваат дека ако играч треба да го напушти теренот за третман поради сомнителна повреда на главата, тој мора да остане надвор од теренот најмалку 30 секунди откако ќе се продолжи со натпреварот.
– Примивме гол кога натпреварот беше целосно под контрола и навистина верувам дека во тој момент не требаше да играме со 10 фудбалери. Фудбалот треба да се игра 11 против 11. Не можеме секогаш да повикуваме медицински тим кога не е потребно. Му кажав на судијата бидејќи тоа се случува премногу често. Мислам дека треба да го разгледаат тоа, треба да го анализираат тоа – рече Силва, пренесе „Би-би-си“.
Пред почетокот на сезонава прописите за третман на сомнителни повреди на главата беа променети и гласат: „Кога играчот има сомнителна повреда на главата и судијата ја прекинува играта, судијата веднаш ќе сигнализира лекар или физиотерапевт да влезе во теренот за да се подобри благосостојбата на играчот, кој ќе треба да го напушти теренот за понатамошна процена и да остане покрај аут-линијата најмалку 30 секунди откако ќе се продолжи со мечот“. На претсезонскиот брифинг, Хауард Веб, главен за судиите во Премиер-лигата изјави дека правилата се насочени и кон подобрување на благосостојбата на играчите и кон спречување манипулации со мечевите.
– Она што го кажавме годинава е дека ако фудбалерот му покаже знаци на судијата дека има потенцијална повреда на главата, обично тоа ќе биде затоа што играчот паѓа држејќи ја главата. Ако судијата одлучи да ја прекине играта главно поради загриженост околу повреда на главата или потенцијална повреда на главата, тогаш веднаш ќе повика лекар или физиотерапевт. Сакаме да се осигуриме дека играчот ќе добие помош ако има вистинска повреда на главата, но, исто така, имаше и чувство дека премногу пати играчите паѓаа држејќи се за главите. Потоа играта беше прекината како резултат на тоа и играчот беше апсолутно добро. Тоа е за да се заштити безбедноста на играчот, но се надеваме дека ќе ги одврати луѓето од потенцијално играње со тоа што ќе биде запрена средбата – рече Веб, пренесе „Би-би-си“. Н.М.
