Новите производствени одделенија ќе се простираат на површина од 7.000 квадратни метри и ќе создадат услови за реализирање околу 200 нови вработувања
Посветеноста на перманентниот раст и развој, следењето на трендовите и најновите достигнувања во сферата на фармацијата се главните причини поради кои во изминативе дваесет години „Алкалоид АД Скопје“ се задржа на курсот за континуирано инвестирање, вложувајќи над 200 милиони евра, алоцирани главно во сегментот фармација. Инвестициските потфати во производствени капацитети и опрема, лаборатории, институт за истражување и развој, центар за контрола на квалитетот, модерен САП (SAP) софтвер, технологија и добро обучен персонал, менаџментот на „Алкалоид“ ги смета за неопходни предуслови за зголемување на пласманите и интензивирано глобално позиционирање на производите на брендот „Алкалоид“. Во таа насока се инвестициите во новите производствени одделенија, чиј износ ќе достигне 11 милиони евра и кои, како и другите, ќе се изведуваат во согласност со строгите барања за добра производствена практика (GMP).
Од планираните 11 милиони евра, 3,5 милиони ќе бидат наменети за целосно технолошко подготвување на одделението „Пакување цврсти форми“, со површина од 2.000 квадратни метри. За потребите на одделението е нарачана техничко-технолошка опрема во вредност од 5,2 милиони евра, вклучувајќи две автоматски линии за пакување. За изградба на два нови ката наменети за производство на цврсти фармацевтски форми и придружен простор за техничко-технолошка опрема со вкупна површина од 5.000 квадратни метри ќе бидат инвестирани 2,3 милиони евра. Сето ова ќе овозможи зголемување на капацитетите за производство за најмалку 50 проценти, односно од сегашниот капацитет од речиси 2 милијарди таблети и капсули годишно на повеќе од 3 милијарди парчиња цврсти фармацевтски форми.
– Во согласност со стратегијата за развој и долгорочниот план за капитални вложувања, „Алкалоид“ иницира нова фаза во инвестициските активности, која има за цел зголемување на производствените капацитети на компанијата. Планираната инвестиција е во согласност со политиката на компанијата за вложување во капитални проекти, а со оглед на тројното зголемување на консолидираните приходи од продажби во изминативе 15 години, ваквиот потфат беше неопходен за овозможување уште поинтензивни пласмани и континуиран раст – изјави г. Живко Мукаетов, генерален директор и претседател на управниот одбор на компанијата.
Комплетирањето на оваа инвестиција, планирано за првата половина од 2020 година, ќе создаде услови за реализирање околу 200 нови вработувања во сегментот фармација.
