Среќен сум и тажен. Среќен сум затоа што Божјата волја беше да се родам во Македонската лулка. А тажен бидејќи сите ние заедно споделувајќи ја радоста што му припаѓаме на овој народ, се туку и секаде некому му се објаснуваме и докажуваме, се што имаме и од неа никогаш и под никакви услови нема да се откажеме – порача коментаторот Тони Стојановски на денешниот протест пред Владата против прифаќањето на францускиот предлог.
Стојановски пред присутните порача дека македонскиот народ е добродушен, но не и наивен, како и дека туѓото го почитуваме.
– Ќе слушнат дека ние се родивме, живееме и ќе умреме во Македонија. Добродушни сме но, наивни не сме. Зло не мислиме, но зло повеќе не трпиме. На секој предлог, договор и услов кој што постои за нас ќе одговориме со НЕ, НЕ и уште едно НЕ. Туѓото го почитуваме, добрата волја ја цениме, но вечерва овде, а и утре и задутре ако треба и во еоните ќе испратиме лавовски крик за да се разбуди исконот кај заспаните меѓу нас – рече тој.
Стојаноски потенцираше дека македонскиот народ е исправен пред тешка задача и токму поради тоа од платото пред Владата порача нон пасаран.
– Македонци мои ние сме исправени пред тешка задача. Да љубиме безусловно, а да ни поставуваат услови. Да почитуваме безгранично, а да ни поставуваат граници. Да сме подготвени на компромиси, а да ни нудат ропство. Вечерва им велиме нон пасаран – истакна тој.
– Подадовме рака, ни ја бараат душата. А има ли цена душата? Колку гроша вреди крвта на предците, колку милиони вреди комфорот на наследниците? Ќе ги има ли воопшто ако се продадеме – праша Стојановски.
Стојановски изјави дека колку и да се обидуваат од државниот врв нарекувајќи ги самопрокламирани визионери, нема не можат да ја сотрат Македонија.
Само безумните може да веруваат дека иднината се менува на подобро со капитулантски потпис со откажување од претходната и со условување на следната генерација. И затоа наша обврска е повторно да им кажеме НЕ, Македонија НЕ БИЛА, НЕ Е И НИКОГАШ НЕМА ДА БИДЕ НА ПРОДАЖБА.
– Не можат да ја сотрат Македонија, па колку и да сакаат да ја продаваат. Оваа држава Македонија настана со револуција, не една туку повеќе, со јасна историска постојаност. И затоа оваа држава Македонија нема да падне со еволуција на таканаречените европски вредности, туку ако паднеме ние Македонците ќе паднеме од гола сила. А и тоа нема да биде лесно, ниту ќе биде со наша добра волја, ниту ќе биде со потпис на кој било самопрокламиран визионер од државното раководство. Отпорот ќе биде секогаш и засекаде а победата е загарантирана затоа што Македонија, Македонците, македонскиот јазик и историја, култура и идентитет се единствената вистина. Македонци мои вистината се брише само со сила. Но колку и тие да се држат до силата ние нема да отстапиме од вистината – порача Стојановски
Ѓорчева: Вакво негирање е незапаметено во современиот свет, срамна е понудата на ваков документ со ултиматум
Повеќе од две децении сум во вашите домови на фреквенцијата на македонската телевизија, пренесувајќи ви ги случувањата од Македонија и од светот. Јас како Гордана Ѓорчева, говорам на македонски јазик, а македонскиот јазик е моја алатка – изјави новинарката Гордана Ѓорчева на денешниот протест „Ултиматум – не благодарам“.
Таа истакна дека македонскиот јазик е сврзното ткиво меѓу Македонците, јазикот не е само средство за комуникација, македонскиот јазик во себе ги чува историјата, посебноста, традицијата, културата, македонскиот јазик во себе ја чува иднината.
– Невозможно е да се премолчи фактот дека соседна држава, соседен народ, соседна наука го негира постоењето на македонскиот народ и тоа да биде прифатено. Дури и како издвоено мислење тоа да биде нагласен дел помеѓу Македонија и ЕУ, тоа не може да биде дел од документ, барем не дел од ЕУ која почива врз начелото за правата на човекот, правата на еднаквостите – истакна Ѓорчева.
Таа посочи дека македонскиот јазик е јазик на кој е пренесувана македонската историја, македонскиот јазик е јазик на македонската наука, македонскиот јазик е јазик на македонската борба за слобода и еднаквост во припадноста во светската цивилизација.
– Негирањето на правото на самоопределување и условувањето на македонските европските интеграции со прифаќањето на еднострано бришење на културната и историската посебност и еднострано непризнавање на јазикот, не е дел од критериумите ниту за членство во ЕУ ниту правило меѓу државите членки – рече Ѓорчева.
Ѓорчева нагласи дека во документот за преговори никаде немаме гаранција дека во ревизијата или во оние годишни извештаи нема да се појават проблематизирања и инсистирања за јазикот во учебниците или поставената линија од Бугарија во 1945 година.
– Кодификација не значи измислување на јазик, бидејќи тој постоел и во непишана форма. Вакво негирање е незапаметено во современиот свет. Жално и срамна е понудата на ваков документ со ултиматум – потенцираше Ѓорчева.
