Согласно Деловникот на Собранието, собранискиот претседател Талат Џафери ќе информира за датумот за свикување на пленарната седница на чиј дневен ред ќе биде Информацијата за содржината на предлог-преговарачката рамка доставена од Владата до законодавниот дом, соопшти денеска Кабинетот на претседателот на Собранието.
Како што се наведува во соопштението, на денешната редовна координација, собранискиот претседател Талат Џафери информира дека согласно член 185 од Деловникот на Собранието, тој ја доставува Информацијата до пратениците во форма во која што е добиена и нема надлежност да навлегува во нејзината содржина и нема деловничка одредба која што му овозможува да ја врати информацијата до предлагачот.
– Според процедурата, Информацијата која што е на дневен ред на пленарна седница се усвојува со донесување на Заклучоци по однос на Информацијата – додаде Џафери.
Вицепремиерот за европски прашања Бојан Маричиќ, кој присуствуваше на координацијата, информира дека ќе ги пренесе ставовите на опозицијата и информациите од оваа средба до Владата за потребата да се дополни Информацијата со материјалите кои што се јавно достапни и во неа се наведени како референца.
На денешната редовна координација свикана од претседателот на Собранието, Џафери, присуствуваа и потпретседателот на Собранието, Горан Мисовски, координаторите на пратеничките групи на ВМРО-ДПМНЕ, Никола Мицевски, на СДСМ, Јован Митревски, на ДУИ, Арбер Адеми и на Алијанса на Албанците, Илире Даути, како и претставниците на политичките партии БЕСА, Алтернатива и Левица.
Инаку, за денеска во Собранието е закажана пленарна седница со една точка на дневен ред – Ребаланс на Буџетот, за која што расправата ќе трае до пет дена.
Материјалите на кои инсистира опозицијата во врска Информацијата за содржината на предлог-преговарачката рамка, испратена од Владата до законодавниот дом, ќе им бидат дополнително доставени до пратениците преку претседателот на Собранието, информира денеска координаторот пратеничката група на СДСМ, Јован Митревски по денешната координација посветена на Информацијата.
– Ако овие материјали не биле достапни, тогаш што сме правеле ние 3-4 часа, врз основа на кои документи сме разговарале. Врз основа на кои документи се создава впечаток или врз основа на кои документи се држат прес-конференции од страна на опозициската партија, така што затоа уште еднаш ова можам да го наречам само политички фолклор, рече Митревски.
Во однос на тоа дали ќе се одржи нова средба на работната група на собраниските политички партии во врска со предлог-преговарачката рамка, Митревски информира идејата на првата средба била да се договорат заклучоци по однос на Информацијата и по завршување на дискусијата по неа, тие заклучоци да бидат предмет на гласање.
– Заклучоците се ставаат на гласање и врз основа на тие предлог-заклучоци пратениците се изјаснуваат. Од друга страна, имавме предлози за промени во преговарачката рамка што не се возможни. Значи, не е возможно ние да ја задолжиме Владата да ја промени преговарачката рамка, која што ја доставува ЕУ. По таа логика би требало ние да ја задолжиме ЕУ да ја промени преговарачката рамка. И во однос на тоа прашање дали ќе продолжат тие разговори еве јавно кажувам дека сме отворени и денес и вечер и утре и кога ќе одлучат пратениците од опозицијата да разговараме за предлог-заклучоците, изјави Митревски.
Тој додаде дека со тие предлог-заклучоци ќе бидат избиени сите дилеми во јавноста, во делот на јазикот, иако е чист, и за делот на историјата, билатералните прашања, образованието, за посебноста на македонскиот народ, за посебноста со сите нејзини елементи, за идентитетот.
– Се она што ќе го донесеме како заклучок тоа ќе биде задолжение на Владата како да се однесува во периодот којшто следи. Со тие заклучоци ја обврзуваме Владата дека македонскиот јазик останува и ќе остане секогаш чист за оваа Влада, за следна влада, за која и да било влада во следниот период затоа што ова ќе биде процес којшто не почнува и не завршува со чинот на гласање, туку ќе биде процес кој ќе трае во следните години, неколку години, истакна Митревски.
Во врска со билатералниот протокол со Бугарија, Митревски потенцира дека неговата содржина се уште не е договорен и таков документ не е потпишан.
– Кога ќе биде потпишан и кога ќе биде договорен тогаш ќе биде објавен за цела јавност и верувајте дека се ова што сега се зборува ќе видите дека тогаш кога ќе биде објавен ќе биде се побиено, додаде Митревски.
