Како што имавме социјален дијалог за основно и за средно образование, отворен сум за соработка и ја очекувам со репрезентативниот синдикат за високото образование, изјави министерот за образование и наука Јетон Шаќири, во врска со протестот кој за утре е најавен од професори на Универзитетот „Св. Кирил и Методиј“, кои бараат потпишување на Колективниот договор и зголемување на платите.
Шаќири рече дека со ребалансот на буџетот е предвидено повисоки плати да имаат од септември, дека средствата се предвидени и таа постапка е почната од неговата претходничка Мила Царовска.
– Во ребалансот на буџетот, и од претходната министерка има почнато постапка, предвидени се средства за повисоки плати и во високото образование. Тие најавија дека ќе имат мирен протест првиот ден, потоа очекувам, идната недела, да имаме состанок за да видиме пред јунската сесија да немаат последици студентите и да има разбирање за овој процес – рече Шаќири одговарајќи на новинарско прашање при посетата на ОУ „26 Јули“ во општина Шуто Оризари.
На прашањето што доколку има бојкот на јунската сесија за полагање на испитите, Шаќири одговори дека како и за штрајкот во училиштата бил, како што рече, против закани за прекин на наставата.
– И ова не го гледам како добра постапка на синдикатот затоа што никогаш, ни од мене, ниту од Владата, не е кажано дека нема да има разговори и прекин на разговори и дека нема да имаат подобри услови. И во преговорите со СОНК баравме разбирање заради некои економски показатели кои не беа и не зависеа само од образование, туку и од економски движења кои не се само во нашата земја, туку и во регионот и подалеку. Така што, ако ова се закани, нека бидат предупредување, нека се реализира испитната сесија – рече Шаќири.
Додаде дека треба да се разговара за начините на финансирање, кои се различни на високообразовните институции, и дека ако добро се организираат буџетите може, како што рече, да се постигне поголем успех.
