Заменик претседателот на Владата задолжен за европски прашања, Бујар Османи, денеска имаше средба со новоименуваниот амбасадор на Република Полска во земјава, Војчех Јежи Тичињски.
– Вицепремиерот Османи најпрвин упати честитки до амбасадорот Тичињски за именувањето на оваа функција, при што потенцираше дека за нашата земја од особено значење е поддршката и помошта од Република Полска за реализација на нашите зацртани стратешки цели, членство во НАТО и во Европската Унија и притоа изрази надеж дека ваквиот пристап на соработка ќе продолжи во текот на неговиот мандат. Обврските кои произлегуваат од јунските самити претставуваат обврски за нас за кои постои целосна посветеност не само на Владата, туку и на севкупниот значаен општествен и политички фактор, истакна Османи, посочувајќи и на Полското искуство во преговорите како значаен инпут за подготовка на преговарачката структура за унапредување на ефикасноста во преговорите, соопшти СЕП.
Османи истакна дека поддршката од Полска, како билатерална, така и на евроинтегративен процес, Македонија ја смета за особено важна, не само како политички став внатре во Европската Унија, туку и како суштински придонес во создавањето на поддршката на процесот на проширувањето и меѓу земјите од Вишеградската група.
Тој го информираше амбасадорот Тичињски и за најновите политички актуелности, односите со Грција, процесот на имплементација на Договорот од Преспа, но и за текот на имеплементација на реформите од Планот 18.
Во текот на разговорот двајцата соговорници изразија взаемно уверување за натамошно зацврстување на пријателските врски меѓу двете земји, преку унапредување на соработката во сите сфери од взаемен интерес.
