Заменик-претседателот на Владата задолжен за европски прашања Бојан Маричиќ денеска присуствуваше на првата меѓувладина конференција на Македонија со Европската Унија, од каде испрати честитки до граѓаните по повод почетокот на преговорите, со кои за земјата и граѓаните е обезбедена поинаква и подобра иднина.
– Сè што правевме досега, сите напори, труд и заложбата кои ги вложивме во процесот на евроинтеграција и негово деблокирање се направени за нашите граѓани да живеат подобро и како сите други европски народи – пишува на својот фејсбук-профил Маричиќ.
Вицепремиерот Маричиќ вели дека со денешната првата Меѓувладина конференција ги отвора преговорите со Унијата, со што формално станува дел од процесот на пристапување кон големото европско семејство и дека овој пат има само еден крај – полноправно членство на МК во ЕУ.
– Пред нас е период на големи предизвици во кој уште повеќе ќе мора да работиме и да се посветиме на реформите, за да ја оправдаме довербата што ни ја укажа ЕУ, но и да ги реализираме очекувањата на нашите граѓани – додава Маричиќ.
Според вицепремиерот Маричиќ ова е најважниот настан за Македонија по членството во НАТО, со што Македонија исполнува уште една стратешка цел, која го одредува патот по кој треба да тргне нашето општество.
Денес во Брисел владината делегација предводена од премиерот Ковачевски присуствуваше на првата меѓувладина конференција на Македонија со Европската Унија, на која беа презентирани општите политички ставови на двете страни. Најпрвин, Европската Унија ја претставува генералната позиција на Европската Унија, по што земјата кандидат ја претставува својата генерална позиција.
По завршувањето на меѓувладината конференција ќе се одржи состанок за отворање на скрининг кој ќе го отворат еврокомесарот за проширување Вархеи и вицепремиерот Маричиќ.
