Со елементите што ги заговара, министерот за правда напорно работи во насока на јазична поларизација, сегрегација и стратегиски – кон федерализација на државата, така што се обидува да го отстрани единственото врзивно ткиво меѓу македонскиот народ и другите заедници во државата, односно јазикот со кој сите се разбираат, што е првото официјално средство за меѓусебна комуникација
Откако му пропадна обидот за етничка припадност во изводите, министерот Лога во нов поход
Обидите да се маргинализира унитарниот карактер на Македонија како држава и таа да се претстави како бинационална продолжуваат во континуитет, и тоа од највисоките претставници во власта.
Актуелниот технички премиер Талат Џафери уште во времето додека беше собраниски спикер флагрантно го прекршуваше Уставот и во обраќањата надвор од земјата говореше на албански јазик, иако уставна обврска му е тоа да го прави на официјалниот македонски јазик. Истата практика ја продолжи и како технички премиер, кога изложувањето на експозето го направи почнувајќи на албански јазик.
По неговите стапки очигледно се движи и актуелниот министер за правда Кренар Лога, кој наместо да биде првиот бедем во одбраната на унитарноста на државата, работи на воспоставување што повеќе бинационални елементи.
Имено, откако претходно не му помина обидот во изводите од матичната книга на родени да воведе етничка графа, сега се обидува преку новите предлог-измени на Законот за правосуден испит, Законот за нотаријат и Законот за извршување да ја инсталира двојазичноста и таму каде што не ѝ е местото, па тие испити да можат да се полагаат и на јазик што го зборуваат најмалку 20 отсто од граѓаните во земјава.
Ваквите предлози се косат со одредбите со кои веќе се регулирани условите за именување нотари, извршители и адвокати, каде што е предвидено задолжително познавање на македонскиот јазик за овие професии, како и за сите лица што вршат јавни функции.
Земајќи го предвид досегашното однесување на министерот, јавноста со право си го поставува прашањето дали министерот Лога ги турка работите кон разбивање на унитарниот карактер на државата со тоа што на секој чекор инсистира да има етнички поделби.
Со елементите што ги заговара, министерот за правда очигледно повеќе работи во насока на федерализација на државата, така што се обидува да го отстрани единственото врзивно ткиво меѓу македонскиот народ и другите заедници во државата, односно јазикот со кој сите се разбираат и кој е првото официјално средство за меѓусебна комуникација.
– Од една страна ни велат дека во ЕУ го заштитиле македонскиот јазик, од друга страна дома се обидуваат да го поткопаат и да го маргинализираат. Македонскиот јазик е официјален јазик и тој мора да биде средство за поврзување и разбирање меѓу сите што живеат во оваа земја, особено во институциите. Кога некој упорно форсира воведување и на втор јазик, односно паралелизам кон македонскиот јазик на секое можно ниво, тогаш иницира поделби и тоа неминовно ќе го наруши и унитарниот карактер на државата. Наместо да ги збиваме редовите, да се обединуваме, ние додаваме разлики, кои уште повеќе ќе нѐ оддалечат меѓу себе – велат некои од аналитичарите со кои се консултиравме околу намерата на министерот за правда во врска со новите законски измени.
Според нив, притисоците за бришење на 20 отсто од Уставот за употребата на албанскиот јазик всушност се во насоката на агендата за која работат многумина во оваа земја, а која на крајот води кон федерализација.
– Кога ќе се избрише и таа одредба од Уставот, тогаш прашање на време е кога Македонија од унитарна ќе стане федерализирана држава. И денес имаме државни институции во кои македонските граѓани не можат да се обратат на македонски јазик бидејќи службениците не го познаваат јазикот, па имаат чувство дека се во некоја друга земја. Јазикот мора да биде последната брана пред да отиде сѐ во неповрат и ако тој не нѐ поврзе, нема што друго – категорични се аналитичарите,
Од интервјуто на Зијадин Села за „Дојче веле“ од 12.7.2015 година
-. ..Нашата политичка платформа… дводомен парламент… за промени на Уставот со кои Македонија би била држава на Македонците и Албанците и би функционирала бинационално… за промени на Уставот за албанскиот јазик да биде службен јазик на цела територија на Македонија…
– …Собранието на Република Македонија би било дводомно и би постоела вистинска консензуална демократија. Албанскиот јазик би бил службен во цела држава, а во делењето на државниот буџет имаме мала промена, конкретна и долгорочна, која би била решена со закон. Буџетот во иднина би се делел по локална, а не по централна или етничка линија, како што е сега…
