Фото: Фејсбук

Доналд Трамп Јуниор ја осуди пресудата против Марин Ле Пен. „Франција ја праќа Ле Пен во затвор и ѝ забранува да се кандидира?! Дали се обидуваат само да докажат дека потпретседателот Џеј Ди Венс бил во право за сѐ?!“, напиша Трамп Јуниор на општествената платформа Икс. Тој алудираше на изјавата на потпретседателот на САД, Џеј Ди Венс, кој оцени дека „европските земји се во опасност да сторат цивилизациско самоубиство“ поради ограничувањето на слободата на говорот на европските граѓани

Пресудата на Парискиот суд против Марин Ле Пен отвора многу прашања, од кои едно е со исклучително интересна рефлексија во меѓународни рамки

„Нема да дозволам да бидам елиминирана на ваков начин!“, изреагира Марин Ле Пен откако на 31 март Парискиот суд донесе одлука, која „експлодира“ како политичка бомба со широк одек не само во Франција туку и низ Европа, дури и во Соединетите Американски Држави. Ле Пен, лидерката на партијата Национално собирање на Франција, беше прогласена за виновна и беше осудена (во прв степен) поради „проневера на функцијата и на јавните пари на Европскиот парламент“. Најпроблематичниот дел од пресудата е тоа што нејзе ѝ е забрането да се кандидира за каква било јавна функција во следните пет години, што значи нејзина директна елиминација од трката за нов претседател на Франција во 2027 година.

Кус пресек за пресудата против Ле Пен

Марин Ле Пен беше осудена на четири години затвор (две условни), со парична казна од 100 илјади евра и со забрана да се кандидира за јавни функции – дел од пресудата, кој веднаш стапува во сила! Дури и ако таа поднесе жалба на пресудата, забраната останува во сила! Ле Пен и ако поднесе жалба – и речиси сигурно ќе се жали – забраната останува во сила. Со обвинението беа опфатени, покрај неа, уште и 24 нејзини соработници, меѓу кои девет поранешни пратеници во Европскиот парламент и 12 нивни помошници. Обвинението содржи наводи за „долгогодишна шема во која средствата наменети за ангажирање асистенти се користеле за политички потреби на партијата“.
Парадоксално, од медиуми блиски на власта веднаш проструија ставови дека Ле Пен дури требало да биде и „благодарна“ што поминала толку „евтино“?! Имено, обвинителот побарал дури 10 години затвор за неа и да плати 300 илјади евра, а „штетата“ за Европскиот парламент беше проценета на околу три милиони евра.
Жордан Бардела, сопартиецот на Ле Пен од Националното собирање на Франција, ги повика Французите на „мирна мобилизација“ како одговор на „диктатурата на судиите“. Тој вчера преку интернет-повик ги повика на акција поддржувачите на Марин Ле Пен, барајќи од нив да потпишат петиција за нејзина поддршка и заради нејзина одбрана. Симптоматичен е фактот што оваа пресуда е донесена токму во моменти кога партијата Национално собирање бележи сѐ поголема популарност меѓу Французите и води во сондажите на јавното мислење во Франција, сѐ повеќе загрозувајќи го и фрлајќи ги во сенка актуелните политики на францускиот претседател Макрон. Според медиумите, Ле Пен води на анкетите за претседателските избори во 2027 година со 34-37 отсто поддршка.

Индикатори за инструментализација на судските институции од страна на претседателот на републиката и ставање во негова функција?!

Меѓу политичките аналитичари и експерти во Франција и Европа се шири убедувањето дека пресудата за Ле Пен е одмазда на Макрон и негова политичка пресметка со сѐ попопуларната француска политичарка, која зад себе има веќе три обиди да влезе во Елисејската палата како нова шефица на француската држава. Сега за првпат стана исклучително мала разликата во поддршката меѓу Макрон и неа – но судијката Бернадете Лепентуи со својата пресуда против Ле Пен – велат во полза на Макрон – одлучи не толку да ги заштити фондовите на Европскиот парламент од проневера, туку многу повеќе да му го заштити грбот на Макрон на претседателските избори во 2027 година!
Падна во очи тоа што Марин Ле Пен ја напушти судницата и пред да биде прочитана во целина пресудата против неа. Во француската јавност некои го протолкуваа тоа како своевидна политичка порака, оти излегува од судот, но не и од борбата. Во секој случај може да се очекува дека француската политичарка ќе вложи жалба на оваа контроверзна пресуда, која предизвикува силна поларизација и поделби во Франција. Ако успее да ја собори пресудата, или барем да го поништи делот од неа со кој ѝ се забранува кандидирање на следните претседателски избори, тогаш тоа ќе значи нејзино катапултирање во политичките височини. Но ако не успее, тогаш ќе мора да се помири со крајот на својата политичка кариера.

Пресудата за Ле Пен – отворен судир на Трампова Америка со неолибералната
политичка Европа и со ЕУ

Пресудата за Мари Ле Пен предизвика жестоки реакции во Франција, но се чини уште пожестоки преку океанот и низ Европа. Откако во последните денови од Трампова Америка стасуваа речиси директни пораки дека „се чувствуваат презир и несогласување кон оваа политичка Европа, кон овој концепт, кон оваа дезидеологизацја на фундаментите на европската заедница и кон патот по кој се движи самата Европска Унија“, од вчера се актуализира дилемата: дали започнува и отворениот судир меѓу САД и поодделно ЕУ?!
За издвојување е фактот што американскиот претседател Доналд Трамп ја спореди пресудата против француската лидерка Марин Ле Пен со своите судски процеси во САД. Тој изјави дека петгодишната забрана за Ле Пен да се кандидира на претседателските избори во Франција е „многу сериозно прашање“.
– Ова ме потсетува на нашата земја, многу личи на она што се случува кај нас – изјави во една пригода со исклучително сериозен тон претседателот на Америка, Доналд Трамп.

Џеј Ди Венс: Европските земји се во опасност да сторат цивилизациско самоубиство

Неговиот син Доналд Трамп Јуниор ја осуди пресудата против Марин Ле Пен. „Франција ја праќа Ле Пен во затвор и ѝ забранува да се кандидира?! Дали се обидуваат само да докажат дека потпретседателот Џеј Ди Венс бил во право за сѐ?!“, напиша Трамп Јуниор на општествената платформа Икс. Тој алудираше на изјавата на потпретседателот на Соединетите Американски Држави, Џеј Ди Венс, кој оцени во една претходна изјава дека „европските земји се во опасност да сторат цивилизациско самоубиство“ поради ограничувањето на слободата на говорот на европските граѓани.
– Европа е на работ на цивилизациско самоубиство. Многу земји не се во можност или не сакаат да ги контролираат своите граници. Гледате како ја задушуваат слободата на говорот на своите граѓани? Сакам Европа да напредува и да биде важен сојузник, но дел од тоа е Европа да ги почитува сопствениот народ и суверенитет, а ние не можеме да го направиме тоа за неа – изјави претходно Џеј Ди Венс за „Фокс њуз“.
На општествените мрежи се огласи и Илон Маск, советникот на американскиот претседател Трамп.
– Кога радикалната левица не може да победи преку демократско гласање, тогаш таа го злоупотребува правниот систем за да ги елиминира своите противници. Тоа е нејзиниот стандарден прирачник за дејствување низ светот – напиша Маск.


Италијанскиот премиер Салвини: Ова е лош филм што го гледаме и во други земји како Романија

Во Унгарија, Италија и во Холандија некои од најистакнатите политичари и десничари реагираа со гнев кон пресудата на францускиот суд.
– Јас сум Марин! – изреагира на општествените мрежи унгарскиот премиер Виктор Орбан, чија партија Фидес учествува со Националното собирање на Ле Пен во групата „Патриоти“ во Европскиот парламент во Брисел.
– Во Париз ја осудија Марин Ле Пен и би сакале да ја исклучат од политичкиот живот. Тоа е лош филм што го гледаме и во други земји како Романија – рече италијанскиот вицепремиер Матео Салвини, алудирајќи на одлуката на романските власти да го откажат првиот круг претседателски избори и да му го забранат учеството на популарниот претседателски кандидат Георгеску.
– Нема да бидеме заплашени, нема да застанеме: со полна брзина напред, пријателке! – додаде Салвини.
Во Шпанија, шефот на екстремно десничарската партија Вокс, Сантијаго Абаскал, рече: „Нема да успеат да го замолчат гласот на францускиот народ“. Св.Т.


Дали обидите за политички ликвидации имаат некаква врска со обидите за физички ликвидации на непожелните европски политичари?

 

Загрижува една друга хипотеза на повеќе странски аналитичари, кои малку поопскурно ги аргументираат своите ставови и кои во своите аргументи ги инволвираат и специјалните безбедносно-разузнавачки служби, на западноевропските држави, за кои тврдат дека сѐ уште се исклучително ефикасни со своите „специјални операции“

Анализирано од еден поширок геополитички аспект, Ле Пен е важна и влијателна политичка личност не само во Франција туку и во поширокиот европски контекст. Нејзината опозиција кон Европската Унија, па и НАТО, и отворената поддршка за мултиполарниот свет предизвикаа непријатност, па можеби и нервоза и загриженост во официјален Брисел и остатоците на неолибералните и глобалистички елити во Европа и во САД. Низа аналитичари анализираат различни хипотези низ кои теоретски ги расчистуваат дилемите „дали обидот за судска елиминација на Ле Пен од политичката и претседателската трка би можело да се разбере и како знак дека раководството и политичката елита во ЕУ не дозволуваат посериозна алтернатива во рамките на Европската Унија?“.
Но загрижува една друга хипотеза на повеќе странски аналитичари, кои малку поопскурно ги аргументираат своите ставови и кои во своите аргументи ги инволвираат и специјалните безбедносно-разузнавачки служби на западноевропските држави, за кои тврдат дека сѐ уште се исклучително ефикасни со своите „специјални операции“.
Имено, приказната со пресудата на популарната француска политичарка е и приказна за „демократијата“ на европските либералистички елити. Кога видоа дека им помина примерот со Романија, каде што го елиминираа Канин Георгиеску, за нив непогодниот кандидат за нов претседател, тие сега тргнуваат во поход да ги „решат“ сите низ Европа, кои се пречка за нив – десничари, суверенисти. Тие се толку тврдокорни, што не запираат ни кога имаат луѓе со голема поддршка пред себе, наоѓаат милион начини да ги елиминираат политички. Но и се обидуваат и со физичка елиминација, како што беше обидот за атентат врз словачкиот претседател Фицо. Тој го вклучи алармот во Брисел особено од 2023 година со својата жестока реторика, особено против ЕУ и продолжувањето на војната во Украина.
– Словачка е суверена земја, таа го кажува своето мислење – истакна во една пригода Фицо. Затоа од сѐ уште „непознати нарачатели“ во мај беше извршен обид за физичка ликвидација на Фицо.

Свето Тоевски