Од вкупно 308 расправи по предмети водени од специјалното јавно обвинителство што во текот на 2018 година ги мониторирала коалицијата „Сите за правично судење“, одложени биле вкупно 98 главни расправи, или речиси една третина, додека на 210 биле преземени дејства од страна на странките во предметите.
Вкупно 60 рочишта, или 61 процент биле одложени поради одбраната и обвинетите, додека 23 рочишта или 23 отсто поради судот. За седум рочишта нема образложение зошто се одложени, а седум рочишта се одложени поради други причини, информираат од коалицијата „Сите за правично судење“.
Само еден предмет од вкупно 98 одложени е поради СЈО, додека единствено по предметот „Триста“ не било одложено ниту едно рочиште.
Отсуство на обвинетите било причина за одложување на вкупно 29 рочишта, од кои за десет тоа било од здравствени, а за две од службени причини. Одбраната побарала одложување на 11 рочишта за подобра подготовка, а по пет рочиште биле одложени поради изземање и службени обврски.
Кога причина за одложување на судските постапки е судот, тоа најчесто било поради необезбедени услови или поради судечкиот совет. Најчесто, или во 50 проценти од случаите, судот не можел да обезбеди услови поради постапување на друг суд, за 25 отсто поради немање соодветна судска сала и во 25 проценти поради техничка опрема.
