Државната изборна комисија вечерва на прес-конференција соопшти дека на референдумското прашање „за“ гласале 500.323 или 91,25 проценти, а „против“ 31.886 граѓани или 5,82 проценти.
Излезеноста, според досега обработените 85,71 процент од избирачките места, е 36,11 проценти.
Претседателот на ДИК Оливер Дерковски информира дека вкупниот број на важечки ливчиња е 532.218, на неважечки 16.073 и неупотребени е 969.993.
– Обработен е висок процент на пристигнати резултати. Сметам дека во многу краток рок ќе ги добиеме и останатите резултати и јавноста ќе може за кратко време да ги има комплетните нефоцијални резултати затоа што официјални ќе бидат кога ќе ги пребереме сите записници и кога ќе изминат роковите за приговори. ДИК во законски предвидените рокови во текот на утрешниот ден ќе ги објави и официјалните резултати – рече Дерковски.
Прашан за оценка дали референдумот е успешен или не, Дерковски рече дека согласно законот за да биде успешен референдумот треба да има излезеност од 50 проценти плус еден глас и дека мнозинството треба да се изјасни „за“.
– Согласно неофицијалните резултати повеќе од 85 проценти преброени гласови јасно е дека еден од условите не е исполнет и на референдумот не е донесена одлука – појасни Дерковски.
