Потпретседателката на Бугарија, Илијана Јотова, денеска ги посети бугарските воени гробишта во битолското село Цапари по повод верскиот празник задушница, соопшти прес-центарот на претседателската администрација во Софија.
Како што јави дописникот на МИА од Софија, според Јотова, балканските народи имаат тешка и заедничка историја и колку таа подобро се знае, ќе живееме во мир и разбирање. Таа им се заблагодари на сите што ги обновиле воените гробишта и истакна дека секој споменик е порака, а нејзината порака е никогаш повеќе војна.
Јотова положи цвеќе пред седумте споменици на бугарските офицери закопани во дворот на локалната црква „Св. Георги“ во Цапари. Гробиштата биле формирани за време на Првата светска војна, кога таму биле погребани 214 бугарски војници и офицери. Тоа, како што стои во соопштението, се првите обновени бугарски воени гробишта на територијата на Македонија.
Потпретседателката Јотова присуствуваше и на отворањето на изложбата „125 години од бугарското дипломатско претставништво во Битола“ и на презентацијата на книгата „Досието „Галичица“ и скршената судбина на Панде Ефтимов“ во Генералниот конзулат на Бугарија во Битола. На изложбата присуствуваа и поранешниот претседател на Бугарија (2002-2012), Ѓеорги Прванов, бугарскиот амбасадор Ангел Ангелов, како и претставници на Македонскиот научен институт од Софија и на бугарските здруженија во земјава.
Таа ги коментираше законските измени што ги направи Собранието на Македонија за имињата на здруженијата, истакнувајќи дека Собранието на Македонија е парламент на суверена држава и има право да носи какви било закони, за кои одговорност имаат тие кои ги донеле.
За Договорот за пријателство и добрососедство меѓу Бугарија и Македонија од 2017 година, таа со став дека тоа повеќе не е договор меѓу две земји, туку е дел од европското законодавство и, освен Бугарија, европските институции и сите земји членки строго ќе го следат неговото спроведување. Таа рече дека отсега исклучува да оди по патот на провокациите, додавајќи дека двете страни имаат заеднички интереси и заеднички цели.
