Пораките се и слични и различни, во зависност од амбиентот и регионот, меѓутоа јасно е дека светот влезе во многу турбулентна фаза, дека слободата тешко може да се оствари во услови на опасност по безбедноста, речиси никаде не сме безбедни, изјави Претседателката Гордана Силјановска-Давкова, по состанокот на шефови на држави и влади на „Акаба Процес Балкан 3“ во Софија.
Како што јави известувачот на МИА од Софија, посетата се реализира на покана на претседателот на Република Бугарија, Румен Радев и кралот на Хашемитското Кралство Јордан, Абдула Втори.
Силјановска Давкова иницијативата ја оцени како „извонреден чекор“, посочувајќи дека во случајот Акаба процесот бил концентриран на безбедноста во регионов и споделените мислење и ставови биле дека, уште во „времето на распаѓањето на Југославија се појавиле радикални, екстремни поединици, групи, дури и цели движења“, и оти тоа денеска, „постои во европски рамки и на исток“.
-Причините се повеќе, причините меѓу останатото се во коренот во фактот што се појавија т.н. пропаднати држави и ќе се појавуваат пропаднати држави, држави во кои луѓето не можат да обезбедат пристоен живот и сиот живот го собираат во една торба и тргнуваат во непознатото. Тргаат, преку Балканот и кон Европа – изјави Силјановска Давкова.
Според Силјановска Давкова, допрва ќе се појавуваат проблемите со водата, со храната, и тие ќе се продлабочуваат, и затоа, како што рече потребна е заедничка акција, бидјеќи проблемот е во тоа што понекогаш или веќе секогаш, механизмите кои што ги употребуваат екстремистите, радикалите, терористите, понекогаш се пософистицирани и од они што ги имаат државите или организациите.
– Јас ги опишав состојбите во нашиот регион. Тие се и слични и различни. Кога велам различни мислам на фактот што ние имаме многу повратници на Балканот од боиштата. Некои од нив се задоени со ИСИЛ идеологијата, тоа е нешто со што треба внимателно да се постапува, ама кога е организирано, еве како овде, тогаш имате еден духовен конфорт, дека заедно сме, ќе продолжиме и понатаму. Тука, нема никаква поделбам – изјави Силјановска Давкова.
Ваквите процеси на радикализација, екстремизам, тероризам, според Силјановска Давкова, се подеднакво опасни и треба да се бориме со сите, бидејќи опасна е селективната правда.
-Она што јас го посочив е дека ние и правно реагиравме, бидејќи се санкционира учеството во странски војски, паравоени формации и слично. Понатаму се создадоа органи, кои што се занимават со ова. Се разменуваат информации, но што е најважното. Тоа беше, мојата завршна реч, дека понекогаш погрешно го употребуваме зборот фундаментализам и го врзуваме само за исламот. Всушност, дека отсуството на почитувањето на фундаменталните вредности присутни во секоја религија, доведуваат до вакви појави и вакви процеси и дека треба да ги мериме зборовите, треба да ги соединиме активностите и дека, ако ги учиме младите уште од основно училиште дека во сите религии, основни се тие вредности за мир, за почит, за помош, се виде тоа и во случајот на нашата трагедија, односно катастрофа, тогаш ќе може светот да живее мирно и дека е многу важно различните групи да соработуваат и живеат заедно. Паралелните светови создават и ги продлабочуваат разликите и ги потенцираат предрасудите. Кога живееме заедно гледаме дека многу сме слични – изјави Силјановска Давкова.
Македонската претседателка говорeше и на првата сесија од состанокот насловена „Идентификување и разбирање на заканите“.
Форумот „Акаба процес за Балканот 3“ е продолжение на претходните состаноци на оваа тема, одржани во рамките на иницијативата – во 2016 година во Акаба, Јордан и во 2018 година во Тирана, Албанија.
Целта на форумот во Софија е државните лидери од Југоисточна Европа, заедно со претставници на влади, институции и партнери на „Процесот Акаба“, да ја анализираат безбедносната архитектура на Балканот, да разговараат за регионалните механизми за размена на информации и да ги координираат напорите во борбата против илегалната миграција, тероризмот, радикализацијата и екстремизмот.
„Процесот Акаба“ е серија меѓународни состаноци за првпат иницирани од кралот Абдула Втори во 2015 година. Нивната цел е да ја одржат меѓународната и регионалната координација и соработка во борбата против тероризмот, екстремистичките идеологии и радикализацијата преку сеопфатен пристап. За да се поттикне отворен дијалог меѓу учесниците на состаноците на процесот Акаба, дискусиите се одржуваат во неформален амбиент.
