Надворешната канцеларија за криминалистички работи Кавадарци поднесе кривична пријава против поранешниот градоначалник на Општина Кавадарци, А.П., Ѓ.Ч. (58) управител на „Масон инженеринг“ дооел – Скопје и Љ.Ѓ.(63) управител на „Хидроградежен инженеринг“ доо – Скопје, поради постоење на основано сомневање за сторени кривични дела „злоупотреба на службена должност и овластување“ и „бесправно градење“.
Како што се наведува во соопштението на МВР, првопријавениот, кривичните дела ги сторил во периодот од 2014 до 2016 година на тој начин што како градоначалник на општина Кавадарци, ја злоупотребил својата службена положба и овластување во врска со градба на модуларна паркинг/катна гаража на ул. „1 Мај“ во Кавадарци на земјиште сопственост на Република Македонија иако знаел дека за таквата градба нема одобрение за градење издадено од надлежен орган и е исплатена висока фактура за модуларен објект, катна гаража, со што направил вкупна материјална штета на буџетот на Општина Кавадарци во вкупна вредност од 29.773.960 денари.
Второпријавениот кривичните дела ги сторил во периодот од 2014 до 2016 година, злоупотребувајќи ја својата службена положба и овластување како одговорно лице во „Масон инженеринг“ дооел Скопје и во својство на изведувач, изведувал градба на земјиште во соственост на Република Македонија иако знаел дека предметната градба нема одобрение за градење издадено од надлежен орган.
Третопријавениот, кривичното дело го сторил во периодот од 2014 до 2016 година на тој начин што ја злоупотребил својата службена положба и овлстување и како одговорно лице во својство на стручен технички надзор на изградба на градежни работи, вршел надзор над градба иако знаел дека предметната градба нема одобрение за градење издадено од надлежен орган.
