При нашето теренско истражување на булеварите низ Скопје дојдовме до заклучок дека секое трето возило има проблем со замаглување на стаклата во раните утрински часови, но, за жал, сѐ почест е бројот на возачи чии возила без никакви причини одеднаш се замаглуваат. И во тие случаи, возачите најчесто возат дефокусирани, во обид да ги одмаглат стаклата пуштаат парно повеќе од потребното, отвораат прозорци со надеж дека ладниот воздух ќе влијае на одмаглувањето, но има и такви што додека возат го бришат стаклото со крпа. Сите тие обиди за одмаглување ја намалуваат концентрацијата на возачите…
Од новинарското истражување на „Нова Македонија“ за подигнување на степенот на безбедноста на сообраќајот на патиштата
Можеби еден од најголемите зимски проблеми за возачите на кој многу тешко може да се влијае е – замагленото ветробранско стакло, кое драстично ја намалува видливоста при возење, влијае на концентрацијата на возачот, бидејќи тој се обидува на сите можни начини да го избрише замаглувањето, а и претставува еден од најголемите ризици при возење. Со овој проблем возачите најчесто се среќаваат во есенските и во зимските денови и во периоди на врнежливи временски услови.
За замаглувањето на стаклата во возилото, температурата е една од главните причини
Честопати во утринските часови можат да се забележат возила што се движат екстремно побавно од вообичаеното, а како главна причина за тоа се замаглените ветробрански стакла, кои со ништо не можат да се одмаглат.
При нашето теренско истражување на булеварите низ Скопје, броејќи ги возилата со значително забележливо замаглување на стаклата во возилата, дојдовме до заклучок дека секое трето возило има проблем со замаглување во раните утрински часови, но, за жал, сѐ почест е бројот на возачи чии возила без никакви причини одеднаш се замаглуваат.
И во тие случаи, возачите најчесто возат дефокусирани, во обид да ги одмаглат стаклата пуштаат парно повеќе од потребното, отвораат прозорци со надеж дека ладниот воздух ќе влијае на одмаглувањето, но има и такви што додека возат го бришат стаклото со крпа. Сите тие обиди за одмаглување им ја намалуваат концентрацијата на возачите.
Од она што екипата на „Нова Македонија“ успеа да го истражи во консултација со неколку експерти од оваа област, постојат повеќе причини поради кои може да се замаглува ветробранското стакло.
Според Бојан Здравковски, долгогодишен професионален возач, температурата е една од главните причини.
– Маглата од внатрешната или надворешната страна на шофершајбната на вашиот автомобил е кондензација што се формира поради разликите во температурата и влажноста во близината на стаклото. Притоа под влажност мислам на воздухот што го издишуваат патниците во возилото. Тоа е затоа што температурата и влажноста во вашето возило се повисоки отколку надвор. Сета таа топла пареа од здивот на патникот се кондензира на внатрешната страна на шофершајбната и прозорците кога ќе удри во студеното стакло – вели тој.
Според него, има и случаи кога стаклата се замаглуваат и во летниот период.
– Кога стаклата на автомобилот се замаглуваат во лето, кондензацијата обично се јавува на надворешната страна на стаклото на автомобилот, бидејќи температурата и влажноста на надворешната страна на вашиот автомобил се повисоки отколку во внатрешноста каде што работи вашиот ладен и сув клима-уред. Кога топол и влажен летен воздух ќе ги погоди прозорците на вашиот автомобил се формира кондензација на надворешната страна на стаклото – потенцира тој.
Има и други причини за замаглување на стаклата во возилата
Друг проблем поради кој се замаглуваат стаклата се валканите прозорци. Нечистотијата, вели Здравковски, лесно може да се насобере на прозорците на вашиот автомобил.
– Бидејќи честичките од влага имаат поголема веројатност да се залепат на валкана површина отколку на чиста, шофершајбната може да се замагли побрзо од вообичаено. Затоа е важно, независно дали е зима или лето, секогаш возилото однадвор да ви биде чисто – нагласува тој.
Уште една можна причина поради која може да се појави замаглување на стаклата е дефект на возилото, поточно на филтер-кабината.
– Филтер-кабината вообичаено ја има во возилата направени по 2000 година. Филтерот собира полен, прав и други загадувачи и помага во регулирањето на квалитетот на воздухот во вашето возило. Топлиот и ладниот воздух од клима-уредот на вашиот автомобил се филтрираат и преку филтерот во кабината. Вишокот остатоци во филтерот може да влијаат на перформансите на одмрзнувачот на шофершајбната на вашиот автомобил. Го намалуваат квалитетот на воздухот во вашето возило, правејќи го ветробранското стакло подложно на кондензација, што доведува до замаглување – нагласува професионалниот возач.
Како да се ослободите од „маглата“ на прозорците кога надвор е студено?
Не постојат универзални упатства што објаснуваат како да го одмрзнете ветробранското стакло кога температурата надвор од вашиот автомобил е пониска од температурата во вашето возило. Во оваа ситуација, можеби ќе треба да преземете неколку чекори за да го решите проблемот.
Загрејте го возилото
Поставете го грејачот на кабината на максимум. Топлиот воздух задржува повеќе влага отколку ладниот воздух, така што зголемувањето на топлината ќе помогне да се собере влагата што придонела за замаглување на шофершајбната, задните стакла и на стаклата на возилата.
Вклучете го клима-уредот
Исклучете го грејачот на автомобилот, а потоа вклучете ја климата. Ова помага да се извлече влагата од воздухот.
Запрете ја циркулацијата на воздухот
Исклучете го копчето за кружење на воздухот за да дозволите ладен и сув воздух да влезе во вашето возило.
Отворете ги прозорците
Отворете ги малку прозорците на автомобилот неколку минути. Ова ќе предизвика влажниот воздух во автомобилот и ладниот сув воздух надвор од возилото да се здружат за да ги одмаглат прозорците на автомобилот.
Како да се ослободите од маглата на прозорците кога надвор е топло?
Кога прозорците на вашиот автомобил се замаглуваат на високи температури, тоа значи дека нивото на влажност и температурата надвор од вашиот автомобил ги надминуваат оние во вашето возило. Значи, за да ја елиминирате „маглата“ на шофершајбната кога надвор е топло, треба да ги зголемите и нивото на влажност и температурата во вашиот автомобил. Во ова сценарио треба да направите неколку работи.
Активирајте ги бришачите
Користете ги бришачите на вашиот автомобил за да ја отстраните кондензацијата од шофершајбната и од задното стакло.
Исклучете го клима- уредот
Намалете ја климата или целосно исклучете ја. Ова најбрзо ќе ја зголеми температурата на вашиот автомобил, што е услов за одмаглување на стаклото во лето.
Избегнувајте кружење на воздухот
Чувајте го копчето за кружење на воздухот во автомобилот исклучено. На овој начин нивото на влажност и температурата на вашиот автомобил ќе се изедначат со тие надвор од вашето возило.
Совети за спречување замаглување на стаклата на автомобилот
Меѓу најдобрите начини за да се спречи замаглување на шофершајбната е користење средство за чистење прозорци на база на амонијак. Исто така во практиката како ефикасно се докажало дека доколку нанесете пена за бричење на внатрешната страна на шофершајбната и ја избришете ја со друга крпа, значително ќе го намалите проблемот со замаглувањето.
Кога наутро ја стартувате колата, важно е на овие минусни температури истата таа да се одмрзне, значи активирајте го одмрзнувачот за стакла доколку го имате во вашето возило.
Експертите велат дека е важно и каков воздух користите. Затоа препорачуваат користење режим на свеж воздух, а не режим за кружење на воздухот на клима-уредот.
Кон овие проблеми голем придонес имаат и влажните чевли, од кои испарува влага, па важно е да влезете со суви чевлите, поточно да ги избришете.
И, секако, доколку клима-уредот не работи како што треба, потребно е да го сервисирате.
