Експратеничката Фросина Ременски која денес за случајот „Меѓународен сојуз“ доби ослободителна пресуда, кажа дека е задоволна. Таа побара разбирање од јавноста на сите прашања да одговара во наредниот период. За процесот кој се водеше против неа, кажа дека е измачувачки.
-Повеќе од две години и психички и физички и емоционално поминувам низ овој процес. Барам разбирање денеска, да ја добијам пресудата, да ги прочитам наводите и да дадам повеќе образложение за какво било прашање. Сметам дека за случајот премногу зборував, за целокупното постапување за случајот и мислам дека денеска укажувањето на судот во однос на функционерите и политичарите – е нешто на што сериозно треба да се размисли. Сакам да имате разбирање за мојата денешна состојба. Секако, да си ги средам и јас емоциите од овој долг и измачувачки процес за мене, па да стојам на располагање за сите прашања и одговори кои ги имате – рече Ременски.
Четири казни за физички и една за правно лице, изрече судијката Софче Гаврилова-Ефремова заедно со судечкиот совет во случајот „Меѓународен сојуз“.
На претседателот на невладината организација Бојан Јовановски-Боки 13 му изрече девет години, заменик-претседателката Јасна Мандиќ доби четири години, таткото на Боки 13, Миле Јовановски доби условна казна. На асистентката на Боки 13 – Кристина Блажевска ѝе изречена казна од една година. „Меѓународен сојуз“ треба да плати еден милион денари.
