Според експертите, безбедносните појаси се најлесниот и најевтин начин да се избегне повреда при судир. Тие не бараат некоја посебна технологија и се вградени во сите автомобили
ЗОШТО КАМПАЊИ ЗА МОТИВИРАЊЕ НА ВОЗАЧИТЕ ЗА ПОЧИТУВАЊЕ НА СООБРАЌАЈНИТЕ ПРАВИЛА И ПРОПИСИ
Една од причините за големиот број повредени, потешко повредени, па и загинати лица во сообраќајни незгоди е ниското ниво на употреба на сигурносните појаси. И покрај тоа што користењето на сигурносните појаси е законска обврска за која се свесни речиси сите возачи и патници, сепак голем дел возачи и патниците не ја почитуваат оваа законска обврска. Според едно сериозно длабинско истражување, носењето на појасот како патник на предното седиште може да ги ограничи шансите за умерена до фатална повреда за 50 отсто и за смрт за 45 отсто.
ИСТРАЖУВАЊА ОД ПРЕД ПЕДЕСЕТИНА ГОДИНИ ГИ ПОТВРДУВААТ И ДЕНЕШНИТЕ: ЗОШТО МОРА ДА СЕ НОСИ БЕЗБЕДНОСЕН ПОЈАС?
Во просек, 47 отсто од луѓето што погинале во сообраќајни несреќи не ги носеле своите безбедносни појаси, додека користењето појаси секоја година спасува 15.000 животи, покажуваат американските податоци.
За жал, последните податоци за смртност од несреќи се од 2017 година. За пример, само во таа година во САД од 37.133 загинати во сообраќајни несреќи, 17.452 лица не носеле појас. Со стапка на смртност од 47 отсто за оние што ќе изберат да не го направат тоа, носењето појас е апсолутно критично за безбедноста на возачот и патниците. Многумина ја сметаат оваа безбедносна карактеристика како опционална, а воопшто не е така.
Според Националниот совет за безбедност и внатрешни податоци на „Зебра“, податоците уште од 1975 година покажуваат дека безбедносните појаси спасиле 374.276 животи.
– Во 2000 година, само 70,7 отсто од патниците на предните седишта ги носеле своите безбедносни појаси, а 50,9 отсто од смртните случаи на патниците биле како последица на неносење појас – се вели во анализата.
Во 2018 година, 89,6 отсто од возачите и патниците во Соединетите Американски Држави користеле појас, што спасило околу 15.000 животи.
Податоците од 2019 година покажуваат дека речиси 91 отсто од Американците употребувале појас.
Според експертите, безбедносните појаси се најлесниот и најевтин начин да се избегне повреда при судир. Тие не бараат некоја посебна технологија и се вградени во сите автомобили.
Од 2006 година, носењето појас е задолжително во сите возила низ ЕУ, а и во Македонија е задолжително користењето појас. Од почетокот од 2016 година, Републичкиот совет за безбедност на сообраќајот на патиштата стана полноправен член на Европскиот совет за безбедност во сообраќајот (ЕТСЦ), со што почна нова ера во соработката на меѓународно ниво, што значи размена на информации со европските земји во однос на безбедноста во сообраќајот на патиштата, компарација со нашата состојба, спроведување заеднички мерки и активности за подобрување на безбедноста на патиштата и, секако, намалување на бројот на сообраќајни незгоди, а со тоа и намалување на бројот на жртви и сериозно повредени лица.
Според правото на ЕУ, возачите и патниците мора да носат појас на секое седиште што е опремено со појас.
И според европските статистики, неносењето појас е втора најголема причина за смрт на патиштата, по брзото возење. Студијата за безбедност на патиштата на ЕУ заклучува дека акцијата насочена кон употреба на безбедносни појаси може да спаси до 7.300 животи годишно во ЕУ.
И децата мора да се заштитени со заштитен појас. Оние што се со висина помала од 1,35 метар мора да користат одобрен уред за нивната големина, познат како детско седиште или бустер. Повисоките деца можат да користат појас за возрасни.
ПРЕПОРАЧЛИВО Е ОДВРЕМЕ-НАВРЕМЕ ДА СЕ ОСВЕЖУВААТ КАМПАЊИТЕ „СТАВИ ПОЈАС“
Македонија е земја што има голем проблем со почитувањето на сообраќајните правила и прописи. Како последица на тоа, изминатите години сѐ почесто е полициското присуство на улиците низ земјава.
На почетокот на месецов во Битола беше реализирана кампања „Стави појас“, за зголемување на безбедноста во сообраќајот и издигање на свеста за употреба на сигурносните појаси од страна на возачите и патниците.
– Со користењето на сигурносните појаси во возилата се оневозможува удирање на возачот, односно патникот, со лицето во ветробранското стакло или удар со колената во каросеријата. Човечкото тело и под дејство на инерција останува во седечка положба. Сигурносните појаси значително придонесуваат за намалување на бројот на смртни случаи при сообраќајни незгоди. Статистиката покажува дека во таков случај бројот на смртни случаи се намалува за 60 отсто – рече претседателката на РСБСП, Гордана Кожуваровска.
Интересни факти за сигурносниот појас: Бил измислен пред автомобилот!
Изненадува фактот дека оригиналниот сигурносен појас всушност бил измислен пред автомобилот. Пионер на англискиот пронаоѓач Џорџ Кејли, овој ран безбедносен појас изгледал многу различно од модерниот дизајн и бил наменет да ги спречи пилотите да паднат од нивните едрилици.
Сепак, Американецот Едвард Џеј Клагорн го патентирал првиот појас во 1885 година. Неговиот модел имал цел да ги спречи туристите да паѓаат од њујоршките таксија. По ова, сигурносниот појас полека доби популарност, бидејќи автомобилите станаа побрзи и почести.
За многумина, безбедносниот појас ја исполни едноставната цел да го задржи возачот во автомобилот. До 1930-тите, потребата од појасот стана јасна, а производителите беа повикани да ги стават во своите автомобили.
Во 1959 година, модерниот безбедносен појас со три точки беше измислен од инженерот на „Волво“, Нилс Болин. Неговиот иновативен дизајн со попречни ремени беше и побезбеден и полесен за употреба. Овие сигурносни појаси работеле со обликот на телото за да ги зачуваат возачите и патниците безбедни.
Беше потребно време до 1968 година за безбедносните појаси да бидат задолжителни во автомобилите во Обединетото Кралство. Дури и тогаш, законот го опфати само поставувањето на појасите на возачкото седиште. Законодавството наложуваше сите автомобили произведени по 1965 година да бидат опремени со сигурносни појаси. Иако автомобилите мораа да се испорачуваат со појаси, возачите сè уште не беа обврзани со закон да ги носат.
Понатамошното законодавство за појаси беше воведено во 1983 година. Овој закон бараше сите возачи и патници на предните седишта во Обединетото Кралство да носат појаси, а во 1987 година задните појаси станаа услов во сите автомобили. Во 1989 година, децата во задниот дел на автомобилите мораа да носат појаси. Сепак, шокантно е тоа што дури во 1991 година од сите патници во автомобилот се барало да носат појас.
Можеби законите се движеа бавно, но честите кампањи во 1970-тите ги охрабрија британските возачи и патници да ги врзат своите безбедносни појаси.
daniela,[email protected]
