Кривична пријава е поднесена против А.М., полициски службеник во ПСОН Охрид при СВР Охрид, осомничен за кривично дело „неовластено производство и пуштање во промет на наркотични дроги, психотропни супстанции и прекурзори“.
Како што информира Министерството за внатрешни работи, кривичната пријава до надлежното Основно јавно обвинителство Охрид ја поднел Одделот за внатрешна контрола, криминалистички истраги и професионални стандарди при МВР.
Министерството соопшти дека во работната просторија – стражарска куќарка каде што А.М работел на обезбедување на вила „Бела“, сопственост на МВР, била пронајдена бела прашкаста материја.
-Во временскиот период кога полицискиот службеник А.М. бил предвиден за работа и извршувал работни задачи на обезбедување на вила Бела (поранешна вила Македонија), сопственост на Министерството за внатрешни работи, од страна на вработени во Одделот за внатрешна контрола, криминалистички истраги и професионални стандарди бил извршен преглед врз А.М. и работната просторија – стражарската куќарка, при што од прегледот во работната просторија, на работната маса била затекната метална лажица во која имало бела прашкаста материја, хартиена салфетка во која имало бела прашкаста материја и мало пластично шише со нн течност, со импровизирана цевка од банкнота од 10 денари, затворено со алуминиумска фолија на отворот на шишето, на која имало остатоци од нн материја – информира МВР.
Вработени од Одделот за внатрешна контрола, криминалистички истраги и професионални стандарди го известиле А.М. дека е потребно да му се направи испитување за присуство на матаболити од наркотични средства во урината во Институтот за судска медицина во Скопје.
А.М. одбил да соработува со вработените на Одделот и да се подложи на испитување иако, како што наведува МВР, доктор на Итна медицинска помош Охрид утврдил дека тој е во добра општа состојба и може да патува во Скопје.
-Против А.М. од страна на Одделот за внатрешна контрола, криминалистички истраги и професионални стандарди веќе е покрената дисциплинска постапка и задолжителна мерка за отстранување од работното место – суспензија од работното место – соопшти Министерството за внатрешни работи.
