Премиерот Зоран Заев и министерката за образование и наука, Мила Царовска, денеска се обратија пред студентите и професорите на Природно-математичкиот факултет во Скопје по повод новата академска година и првиот академски час и им посакаа успешна академска година и висока мотивираност во остварувањето на академски успеси.
На настанот присуствуваа и ректорот на Универзитетот „Св. Кирил и Методиј“, Никола Јанкуловски, и деканот на Природно-математичкиот факултет, Александар Скепаровски.
Во оваа пригода премиерот Зоран Заев истакна дека Владата и Министерството за образование и наука остануваат посветени на градењето квалитетно високо образование и продолжуваат со креирањето програми и политики за поддршка на студентскиот стандард и за современи услови за настава, како и за спроведување на научноистражувачките проекти на факултетските институти.
„Значително ја променивме политиката за стипендирање студенти со цел да се излезе во пресрет на што повеќе млади, со повисоки месечни износи со кои студентите навистина ќе ја почувствуваат поддршката што државата им ја обезбедува во текот на образовниот процес. Па, така, за повеќето од категориите студентски стипендии, месечните износи се зголемени, некаде и над 80 %. Ве поттикнувам да ги прифатите овие можности, кои во голема мера ќе ви го олеснат студирањето“, порача Заев.
Тој истакна дека од оваа година почна и поддршката на студентите со субвенционираниот студентски оброк.
На студентите на Природно-математичкиот факултет во Скопје премиерот Зоран Заев им порача дека со својот академски избор направиле чекор кон квалитетно и меѓународно валоризирано образование, на високообразовна институција, која е дел од европската академска мрежа „Еразмус“.
Премиерот им посака успешна академска година на студентите и професорите на сите факултети во земјата и истакна дека е особено важно што со почетокот на оваа академска година наставата и другите активности се враќаат во амфитеатрите, кабинетите и во лабораториите на студентските кампуси со задолжителното почитување на протоколите за организирање и спроведување на наставата и другите академски активности во услови на пандемија.
Министерката за образование и наука, Мила Царовска, на студентите им посака успешна академска година и посветено студирање, кое ќе ги подготви за предизвиците што ги очекуваат понатаму во животот.
