Моментно во болниците низ Македонија хоспитализирани се вкупно 419 лица кои се позитивни на коронавирус.
Според последните информации од Министерството за здравство, на Инфективната клиника во изминативе 24 часа примени се 3 пациенти. Вкупно се хоспитализирани 93 пациенти. На кислородна поддршка се 53 пациенти, нема пациенти на механичка вентилација.
Во болницата во Козле хоспитализирани се 5 деца и 6 мајки позитивни на ковид-19, 1 дете и 1 мајка суспектни на вирусот.
Во ГОБ „8 Септември“ примени се 5, а вкупно хоспитализирани се 45 пациент. На респиратор се 3 пациенти.
Во болницата во Битола се хоспитализирани 29, а во болницата во Штип се 48 пациенти. На инфективните одделенија во Тетово, Охрид, Велес, Куманово, Прилеп, Гостивар, Струмица и Струга се хоспитализирани 191, позитивни и сомнителни на Ковид-19.
Инфективна е речиси исполнета, подготвена е монтажната болница
Капацитетот на Клиниката за инфективни болести во Скопје е речиси исполнет, па за прием на нови пациенти веќе е подготвена модуларната болница во близина на клиничката зграда.
Министерството за здравство јави дека активно се работи на реорганизација на болничките капацитети и медицинскиот ладар по системот на ротација.
Министерот Венко Филипче, рече дека во модуларната болница има доволен број на медицински кадар. Тој изјави дека нема да се преоптоварува капацитетот повеќе од тоа што е сега, за да не трпат останатите одделенија и здравствените работници.
Струмичката болница преполна со пациенти, се бара дополнителен персонал
Директорот на струмичката болница, Наќе Гогов денеска изјави дека капацитетите на струмичката болница се исполнети, а проблем има и со медицинскиот персонал.
Тој рече дека се планира поставување на седум кревети во другите амбуланти, но, како што вели, засега најголем проблем е персоналот.
Директорот побарал помош од институциите, па очекува од среда да биде испратен дополнителен медицински персонал.
