Група Албанци создале вистинска индустрија на фалсификувани тестови на коронавирусот, кои граѓаните масовно ги купувале со цел да ја преминат границата со Грција.
Лажните ПЦР-тестови биле откриени од медиумските мрежи „Топ чанел“ и СТАР од Албанија наведувајќи дека групата фалсификатори работи првенствено на северот на Албанија.
Албанските власти пронајдоа многу фалсификувани тестови и тоа беше причината поради која Грција од денес го затвори граничниот премин Кристалопиги.
Патниците од Албанија сега ќе мора да одат преку граничниот премин Какавија, каде што ќе бидат подложени на брз тест, со задолжително покажување и негативен ПЦР-тест не постар од 72 часа.
СТАР објави како изгледа лажен, а вистински ПЦР-тест, разликите се забележуваат, пред сè, во логото на дијагностичкиот центар каде што е направен тестот, но и во потписот и печатот на докторот, кој ниту бил виновен ниту бил должен да стане жртва на фалсификување.
Наводно, многу од оние што ја преминале грчката граница со лажни тестови веќе знаеле дека се заразени од корона и отишле во Грција првенствено на лекување затоа што не му веруваат на албанскиот здравствен систем.
Телевизијата го објави и случајот на 20-годишна жена, која завчера со лажен тест се обидела да го премине преминот Какавија, но била забележана по што избегала. Досега се уапсени неколку Албанци.
