Европската агенција за лекови (ЕМА) препорача секоја земја сама да одлучи како ќе го третира нивниот заклучок дека по приемот на вакцината „Астра зенека“ постои ризик од згрутчување на крвта.
– Ние се обидовме да обезбедиме што е можно повеќе информации за придобивките и ризиците што ги идентификувавме, и врз основа на тоа, но и земајќи ја предвид моменталната состојба со пандемијата и можноста за набавка на други вакцини, државите можат да донесат различни одлуки за вакцината „Астра зенека – изјави директорката на ЕМА, Емер Кук.
Заеднички заклучок не донесоа ниту министрите за здравство на членките на ЕУ, и покрај повиците за координација меѓу земјите-членки во борбата за отстранување на јавната недоверба кон вакцината.
Министрите одржаа вонредна виртуелна средба. Пред средбата, Португалија, која претседава со Советот на ЕУ, испратила писмо во кое се повикуваат министрите да најдат „заеднички јазик” во врска со употребата на вакцината, пренесуваат британски медиуми. Сепак до таков договор не дојде и земјите-членки ги задржаа различните препораки за вакцината. Се очекува разговорите на оваа тема да продолжат.
Во изминатите десет дена неколку земји, меѓу кои и Македонија, ја забранија употребата на „АстраЗенека„ за лицата под 60 или 55 години, со очекување дека конечната одлука ќе ја донесе ЕМА. Во Франција веќе се поднесени првите тужби поради смртта на луѓе по примањето на вакцината „Астра зенека“.
