Балканските лидери се поканети во Брисел додека во нивните држави постои загриженост за членството во Европската Унија, по одлуката на блокот да не почне пристапни преговори со Македонија и со Албанија, пишува „Ајриш тајмс“.
– ЕУ исто така е загрижена дека ваквата пречка би можела да предизвика политичка нестабилност на Балканот, во ситуација кога Македонија свика предвремени избори, а Русија и Кина би можеле да го засилат влијанието во регионот – се наведува во анализата на ирскиот весник.
Премиерот Зоран Заев денеска ќе оди на средба во Рим со италијанскиот премиер Џузепе Конте. Веста за средбата се поврзува со ставот на Италија од идниот месец да го врати во игра прашањето за старт на преговори на ЕУ со Македонија.
Италијанскиот премиер Џузепе Конте, пред една недела изјави дека Италија ќе предложи рестартирање на разговорите за проширување на ЕУ со Македонија и со Албанија уште во ноември и поради тоа премиерот Заев доби покана од него многу скоро да го посети Рим.
По средбата со Конте, Заев лета за Брисел на работната вечера што високата претставничка на Европската Унија за надворешна политика и безбедност, Федерика Могерини ја организира со лидерите на Западен Балкан.
Овој пат вечерата е закажана порано од вообичаениот термин во декември, поради тоа што се работи за последните денови на Могерини на чело на европската дипломатија и чиј мандат истекува на 1 декември. На средбата се очекува да се разменат мислења за случувањата во регионот, за предизвиците и за она што е постигнато досега. Потврдено е дека во Брисел ќе одат сите шест западнобалкански партнери.
