Уништени се 60.809 килограми небезбедна храна од животинско потекло (месо, производи од месо и од млеко, риби, мед и јајца) од почетокот на годинава до крајот на минатиот месец. Од тие количества, инспекциските служби на Агенцијата за храна и ветеринарство (АХВ), во рамките на планираните официјални контроли и вонредните инспекциски надзори поништиле 17.141 килограми небезбедна храна, соопшти вчера АХВ.
Поголем дел, или 43.668 килограми небезбедна храна, уништиле оператори врз основа на воспоставени внатрешни контролни системи за безбедност на храната – (HACCP).
Од уништената небезбедна храна од вкупно уништените количества, 59.298 килограми се од домашно производство, а остатокот од увоз.
– Врз основа на законските надлежности и воспоставениот интегриран систем на контрола, Агенцијата за храна и ветеринарство врши постојан надзор над операторите со храна во поглед на исполнување на општите и посебните услови за безбедност на храната и за заштита на правата на потрошувачите – наведуваат од АХВ.
Недоследности во поглед на безбедноста на храната граѓаните може да пријават во Агенцијата за храна и ветеринарство на бесплатната телефонска линија за потрошувачите 0800 3 22 22, лично, или електронски на [email protected].
