Богатството на 10-те најбогати луѓе во светот се зголемило повеќе од двојно од почетокот на пандемијата на коронавирусот, соопшти британската добротворна организација „Оксфам“. Во меѓувреме, се проценува дека повеќе од 160 милиони луѓе се турнати во сиромаштија, се вели во извештајот „Нееднаквоста убива“, објавен денеска во пресрет на Светскиот економски форум во Давос.
Супербогатите станаа побогати за време на пандемијата, делумно поради огромниот фискален и монетарен стимул што ги зголеми акциите и другите средства. Нов милијардер од почетокот на пандемијата се создава на секои 26 часа.
Користејќи ги податоците собрани од Форбс, „Оксфам“ во новиот извештај вели дека вкупното богатство на милијардерите скокна од 8,6 илјада милијарди долари во март 2020 година на 13,8 илјада милијарди долари во ноември 2021 година, што е поголем пораст отколку во претходните 14 години заедно.
– Зголемените економски, родови и расни нееднаквости, како и нееднаквостите меѓу земјите го распарчуваат нашиот свет. Ова не е случајност, туку избор: „економското насилство“ се спроведува кога се избираат структурни политики за најбогатите и најмоќните луѓе. Тоа ни нанесува директна штета на сите нас, особено на најсиромашните луѓе, жените и девојките, расните групи – се вели во извештајот.
Според извештајот, заедничкото богатство на првите 10 милијардери – вклучувајќи го и извршниот директор на „Тесла“ Илон Маск и основачот на „Амазон“ Џеф Безос – се удвои за време на пандемијата и сега е шест пати поголемо од она на најсиромашните 3,1 милијарди луѓе во светот.
– Никогаш не било поважно да се започне со корекција на насилните неправди и безобразните нееднаквости со враќање на моќта и екстремното богатство на елитите, вклучително и оданочувањето – враќање на тие пари во реалната економија и спасување животи – рече извршната директорка на „Оксфам Интернешонал“ Габриела Бухер.
– Пандемијата на ковид-19 отворено ги откри и мотивот на алчноста и можностите со политички и економски средства, правејќи ја екстремната нееднаквост инструмент за економско насилство – додаде Бухер.
Авторите на документот повикаа на ограничување на екстремното богатство преку прогресивно оданочување, докажани јавни мерки за борба против нееднаквоста и храбра промена на власта во економијата и општеството.
