Се очекува Регулаторната комисија за енергетика (РКЕ) в среда да одржи подготвителна и главна седница на која ќе бидат соопштени цените на блок тарифите, изјави денеска претседателот на РКЕ Марко Бислимоски.
– Во текот на оваа недела, најверојатно в среда, РКЕ ќе одржи подготвителна и главна седница на која ќе ги соопшти цените на блоковите и ниските тарифи, а до тогаш ќе ги оставиме познатите експерти во државата да лицитираат со цените, рече Бислимоски на подготвителната седница за реформата на тарифниот систем за електрична енергија (блок тарифи) што се одржа на ФЕИТ.
На новинарско прашање тој повтори дека цените на блоковите ќе ги објават в среда.
– Колку ќе биде просечно зголемување на цената сето тоа ќе го објавиме в среда. Апсолутно тоа што е во четвртиот блок е само за во четвритот блок, за остананатите блокови ќе се води сметка да можат потрошувачите да си ги платат своите сметки за електрична енегрија доколку имаат своја нормална и разумна потрошувачка со електрична енергија – рече Бислимоски.
Тој изјави дека заклучно со шести месец иако биле планирани 0 денари за набавка на струја од увоз, ЕВН Хоум заради, како што вели, некоректен однос на одредени индустриски потрошувачки и општини направи непланирана набавка од 33 милиони евра.
– Дополнително имаме ситуација да уредбата за кризна состојба се укина и исто така универзалниот снабдувач ќе има обврска да ја откупува електричната енергија и од повластените производители, тоа е некаде околу 10 милиона евра, и цената на ЕСМ е нешто повисока, од 41 евро на 48 евра за мегават часа, но притоа треба да се знае дека и ЕСМ ќе обезбеди загуби на електрична енергија во дистрибутивната мрежа по 143 евра за мегават час. Така да ЕСМ сериозно влијае на намалувањето на ризиците врз цената – истакна Бислимоски и подвлече дека не може во моментов да каже колкаво ќе биде зголемувањето на цените.
Цената по која граѓаните ќе ја плаќаат струјата по 1 јули годинава ќе зависи од тоа колкаво покачување на цената ќе побара универзалниот снабдувач ЕВН хоум, откако ЕСМ, од чија понуда најмногу зависи цената, во петокот понуди цена од 48 e/мегават час на тендерот за снабдување на универзалниот снабдувач со електрична енергија за потребите на регулираниот пазар, што е зголемување од седум евра во однос на минатогодишната цена од по 41 евро за мегават-час.
АД ЕСМ, во соопштение до медиумите, објави дека и годинава повторно ќе испорачаат 100 проценти за потребите на граѓаните и малите потрошувачи, иако законот им дава можност да испорачуваат енергија од само 60 проценти од потребите на ЕВН хоме. ЕСМ учествува со околу 32 проценти во цената за крајните потрошувачи.
МЕПСО и Електродистрибуција минатата недела веќе доставија барање до РКЕ за зголемување на нивниот дел во цената на електричната енергија за 60 до 80 отсто.
