Поради глобалната пандемија од коронавирусот, на светските пазари дојде до намалена побарувачка на зелка, што во нашата држава предизвика проблем со пласманот и откупната цена на зелката, соопшти Министерството за земјоделство, шумарство и водостопанство.
За таа цел во координација со земјоделците, МЗШВ подготви предлог за интервентна мерка за покривање на загубите на производителите на зелка. Предлог- мерката е ставена во систем минатиот петок, но со оглед на тоа дека до денеска немаше седница, истата ќе се разгледува на утрешната владина седница.
Интервентната мерка ќе биде за продадена зелка во периодот од 1-ви април до 30-ти април 2020 година, а заради стабилизирање на пазарот со зелка, бидејќи во месец април поради вонредната состојба предизвикана од коронавирусот дојде до дестабилизација на пазарот и големо намалување на побарувачката и на откупната цена.
– Истовремено, МЗШВ го повикува дополнителниот заменик-министер за земјоделство, шумарство и водостопанство, Цветан Трипуновски, овој период на глобална пандемија со којашто се соочува целиот свет, да не го користи за прибирање на политички поени и манипулација со земјоделците, како што тоа денеска го стори со неговата изјава за откупот на зелка, а при тоа знаејќи дека МЗШВ веќе има предложено интревентна мерка – велат од Министерството.
