ЗОИ 2026
- Стипендистите на „Олимписката солидарност“ освоија седум медали по првата половина од ЗОИ 2026, и тоа два златни, еден сребрен и четири бронзени, плус 22 дипломи, пишува ИОК
Донован Кариљо, натпреварувач во уметничко лизгање од Мексико, и Миалитиана Клерк, алпска скијачка од Мадагаскар, се меѓу 249 спортисти на Зимските олимписки игри (ЗОИ) во Милано и во Кортина д`Ампецо (Италија) што беа поддржани со стипендија од „Олимписката солидарност“, програмата на Интернационалниот олимписки комитет (ИОК) за поддршка на националните олимписки комитети (НОК) и нивните спортисти. Опишани како „менувач на играта“ од Кариљо за неговите подготовки за Игрите, стипендиите на „Олимписката солидарност“ им помагаат на над 200 спортисти да се натпреваруваат и да освојуваат медали на овие Игри. Стипендистите на „Олимписката солидарност“ освоија седум медали по првата половина од ЗОИ 2026, и тоа два златни, еден сребрен и четири бронзени, плус 22 дипломи, пишува ИОК.
– „Олимписката солидарност“ е многу посветена на проширување на нашата поддршка за спортистите и на тренерите, а тоа е во сите спортови, без разлика дали се летни или зимски – појаснува Џејмс Меклеод, директор на ИОК за односи со НОК, „Олимписка солидарност“ и „Олимпизам 365“.
Олимпискиот стипендист Кариљо се натпреваруваше на своите втори ЗОИ, освојувајќи го 22. место во машката поединечна дисциплина. Олимписката стипендистка и знаменосец на Мадагаскар, Клерк, е на пат да стане првата Африканка што ќе се натпреварува на три ЗОИ. Околу 449 спортисти од 90 земји добија стипендии за „Олимписка солидарност“ за време на квалификацискиот период за ЗОИ 2026. Донован и Миалитијана се меѓу 249 спортисти од 74 земји што се пласираа на ЗОИ 2026, кои се вторите вакви игри за Кариљо. Покрај тоа што беше знаменосец на церемонијата на отворањето, тој беше дел од спектакуларното натпреварување во уметничко лизгање за мажи пред преполната арена во Милано.
– Толку сум среќен и почестен што сум тука, во Милано. Многу значи да ја претставувам мојата земја на толку голема сцена како ЗОИ. Беше одлична авантура, се забавував многу, а публиката ме третираше на најдобар можен начин. Исто така, беше многу посебно затоа што моите родители беа во публиката, гледајќи ме првпат на Олимписки игри. Се чувствував заштитено, сакано и инспирирано да дадам сѐ од себе на натпреварот. Тоа беше еден од најдобрите настапи во мојата кариера – рече Кариљо, пренесе ИОК.
Во раните фази од своето патување, откако неговото локално лизгалиште во Мексико се затвори, Кариљо почна да се усовршува на јавно лизгалиште во трговски центар во Леон, каде што мораше да се пробива покрај почетниците и да вежба на која било музика што се свиреше и е благодарен за поддршката што ја доби за да може да го достигне највисокото ниво.
– Носител сум на стипендијата на „Олимписката солидарност“ и тоа беше пресвртница за мене. Во претходните две и пол години тренирам во Торонто, кое е едно од најдобрите места за лизгање во светот затоа што има многу мраз и одлични тренери. За да се добијат овие услови, оваа стипендија беше потребна. Чувствувам дека сум тука денес поради оваа стипендија – рече Кариљо.
Клерк стана првата Африканка што се натпреварува на три ЗОИ кога настапи во велеслалом. Родена на Мадагаскар, таа била посвоена од француска двојка кога била мала и научила да скија во Француските Алпи, домаќин на ЗОИ 2030, пишува ИОК. Стипендијата беше од суштинско значење во нејзиното патување кон создавање историја на ЗОИ 2026 и таа се надева дека ќе го искористи својот пример за да инспирира други да ги бркаат своите соништа.
– Сакам да покажам дека сите имаме шанса да направиме нешто навистина големо во нашите животи. Стипендијата навистина ми помага да тренирам. Можам многу да патувам, а како алпски скијачи мора да патуваме за да ги пронајдеме најдобрите услови за тренинг, тркање, освојување повеќе поени и за подобрување. Благодарение на „Олимписката солидарност“ го живеам сонот на секој спортист и сакам да го покажам најдоброто од себе – вели Клерк, пренесе ИОК.
Со поддршката на „Олимписката солидарност“, која се протега на грантови за поддршка на репрезентации во карлинг и во хокеј на мраз, како и на стипендии за тренери, програмата игра фундаментална улога во поддршката на спортистите да го достигнат нивото потребно за натпреварување на „Олимписки игри“. Во подготовките за ЗОИ 2026, ИОК понуди 449 стипендии за спортисти од 90 земји, во шест различни спорта, со 249 стипендисти што се пласираа, пишува ИОК. Г.И.
