ТЕНИС
- Вкупно 29 сегашни и поранешни играчи што стигнале до првото место во светот ќе одлучат за добитниците на наградите „Пробив на годината“ и „Стефан Едберг“, а за признанието „Тренер на годината“ ќе гласаат тренерите
Тројцата претходни добитници на наградата за спортски дух „Стефан Едберг“, Григор Димитров (2024 година), Карлос Алкараз (2023 г.) и Каспер Руд (2022 г.) повторно се номинирани за таа награда, а Феликс Оже-Алиасим ја заокружува листата на кандидати, а Џек Дрејпер, Жоао Фонсека, Јакуб Менсик и Валентин Вашеро ќе се натпреваруваат за новата награда „Пробив на годината“, пишува Асоцијацијата на тениските професионалци (АТП). Номинираните за овие награди се одредуваат со гласање на Меѓународното здружение на тениски писатели.
Во категоријата „Тренер на годината“ се номинирани Бенџамин Балерет (тренер на Вашеро), Дарен Кехил и Симоне Вањоци (Јаник Синер), Хуан Карлос Фереро и Самуел Лопез (Карлос Алкараз), Фредерик Фонтанг (Оже-Алиасим) и Брајан Шелтон (Бен Шелтон). Во оваа категорија за номинација гласаа членовите на АТП-тренерите.
Првпат членовите на ексклузивниот „АТП клуб број 1“, вкупно 29 сегашни и поранешни играчи што стигнале до првото место во светот, ќе одлучат за добитниците на наградите „Пробив на годината“ и „Стефан Едберг“, а за признанието „Тренер на годината“ ќе гласаат тренерите, пишува АТП.
Трофејот за „Пробив на годината“ му се доделува на тенисерот што го направил најголемиот пробив на АТП-турнејата сезонава, при што се земаат предвид значајни победи и скокови на ранг-листата на АТП и првите титули на АТП-турнејата. Наградата „Стефан Едберг“ му се доделува на играчот што во текот на целата година се однесувал на највисоко ниво на професионализам и интегритет, кој се натпреварувал со своите колеги со фер игра и кој го промовирал тенисот преку своите активности надвор од теренот. Признанието за тренер на годината му се доделува на тренерот што помогнал да го насочи својот тенисер кон повисоко ниво на перформанси во текот на годината, пишува АТП. Н.М.
