Пред самитот во Пекинг
Кина ја отфрли извозната политика на Брисел како „бесмислена“, во пресрет на самитот со претставниците на Европската Унија.
– Ако европската страна наметне сериозни ограничувања на извозот на високотехнолошки производи во Кина, од една страна, и се надева дека значително ќе го зголеми извозот во Кина од друга страна, тоа не е во согласност со здравиот разум – изјави портпаролот на Министерството за надворешни работи Ванг Венбин.
Според ДПА, во позадината на коментарот е огромниот трговски дефицит во корист на Кина, што се очекува да биде тема на средбата на делегацијата предводена од претседателот на Советот на ЕУ Шарл Мишел и претседателката на Европската комисија Урсула фон дер Лајен со шефот на кинеската држава Си Џинпинг в четврток.
Според бројките на ЕУ, трговскиот дефицит неодамна изнесуваше речиси 400 милијарди евра (432 милијарди долари).
Ванг тврди дека податоците не ја одразуваат вистинската дистрибуција на трговијата помеѓу Европа и Кина. Повеќе од една третина од обемот на извозот на европските компании во Кина се враќа во Европа. Затоа, според него, се чини дека Кина има трговски суфицит, но Европа добива „значителен“ дел од профитот.
Покрај трговскиот дефицит, претставниците на ЕУ сакаат да се осврнат и на нелојалната конкурентна состојба за европските компании во Кина.
Спротивно на тоа, Кина најверојатно ќе покрене прашање и за тековната истрага на Брисел за кинеските субвенции за е-автомобили и плановите на економијата на ЕУ да стане помалку зависна од Кина во критичните области.
