Од првиот меч во дивизијата Чемпионшип в петок, додадените минути на крајот од натпреварите во таа дивизија и во Премиер-лигата сега се очекува често да бидат двоцифрени, како што беше на СП. Еден фудбалски судија изјави за „Скај спорт“ дека сега ќе биде реткост ако еден меч од врвната лига трае помалку од 100 минути. Има измени и за третирање на приговорите од фудбалерите, однесувањето на тренерите…
АНГЛИЈА
Спречувањето на губењето време и приговорите, како и многу построгото следење на клупата и техничките области, се во средиштето на новите судиски упатства што ќе стапат во сила на почетокот на фудбалската сезона во Англија, пишува „Скај спорт“.
Од првиот натпревар во дивизијата Чемпионшип в петок, на кој Шефилд венздеј ќе се сретне со Саутемптон, додадените минути на крајот од натпреварите во таа дивизија и во Премиер-лигата сега се очекува често да бидат двоцифрени, како што беше на неодамнешното Светско првенство во Катар. Еден фудбалски судија изјави за „Скај спорт“ дека сега ќе биде реткост ако еден меч од врвната лига трае помалку од 100 минути.
Официјалните лица сѐ повеќе се занимаваат со статистиката, која покажува колку малку се играло на професионалните натпревари во Англија, со просек од минатата сезона од само 48 минути во Лига 2, потоа 50 минути во Лига 1, па 52 минути во Чемпионшип и нешто под 55 минути во Премиер-лигата. Ќе се додава повеќе време и за прославите на головите, за кои официјалните лица сметаат дека станале подолги и покомплексни.
Судиите сега ќе бидат обврзани конкретно да одредат колку долго играта ќе биде прекината пред повторното почнување поради прекини на играта, како што се гол, замена, повреда или подготовки за слободен удар. Во понатамошните обиди да се забрза играта, пониските дивизии сега ќе имаат систем со повеќе топки за сите мечеви, како што е веќе случај во Премиер-лигата. Судиите ќе имаат и задача да бидат поцврсти во казнувањето на „јасните и влијателни акции“ што губат време, оние што се разликуваат од очигледниот чин на шутирање на топката.
На теренот, како обид да се овозможи играта да тече подобро и да се намалат прекините, ќе се примени повисок праг за „контакт“ меѓу играчите, што значи дека треба да има помалку досудени слободни удари за инциденти, кои во минатата сезона можеби беа казнети поради тоа што беа премногу силни. Сепак, според постојните судиски упатства, секој старт што ќе се смета за „невнимателен“ ќе се смета за прекршок, секој што е „невнимателен“ ќе добие жолт картон, а секој играч што ја „загрозува безбедноста“ на противникот ќе биде исклучен, пишува „Скај спорт“.
Прагот за еден играч да добие жолт картон поради приговор ќе биде намален сезонава. Секогаш кога повеќе од еден играч ќе му пријде на судијата, на барем еден од тие играчи, а потенцијално и повеќе, ќе му се покаже автоматски жолт картон. Практично, секој фудбалер што ќе истрча од далечина за да им пријде на официјалните лица на натпреварот ќе биде казнет, пишува „Скај спорт“.
Однесувањето на тренерите и на вработените на клупата ќе биде под поголема лупа, со автоматски жолт картон доколку има повеќе од еден тренер во техничката област и построги казни за менаџерите што ќе ја напуштат својата техничка област. Агресијата од тренерите кон официјалните лица на натпреварот или кон противниците, рутински ќе биде дочекана со црвен картон, а на секој функционер на клубот што ќе биде исклучен веќе нема да му биде дозволено да го следи натпреварот од трибините. Наместо тоа, тој ќе мора да оди надвор од теренот. Н.М.
