Преминот на потрошувачите кон алтернативни извори на протеини е најзначајниот светски тренд во прехранбената индустрија. Во последниве години, побарувачката за додатоци во исхраната и интересот за персонализирана исхрана се зголемија.
Храната и новите технологии
Алтернативни протеини
Алтернативните протеини се храна што се консумира како замена за месото и морските плодови. Потрошувачите го избираат овој избор и поради здравствени и еколошки причини. Алтернативата на месо е богата со хранливи материи, а алтернативните извори на протеини вклучуваат алги, модифицирани мешунки и разни замени, како лабораториско месо, месо од растително потекло, инсекти, протеини од квасец. Пазарниот удел на алтернативните протеини значително се зголеми во текот на изминатата деценија, а голем број производи се наоѓаат во супермаркетите низ светот.
Според научната литература, три фактори доведоа до зголемување на потрошувачката на алтернативни протеини: благосостојбата на животните, еколошката пријатност и преференциите за вкус. На бранот на овој тренд се многу стартапи, кои благодарение на новите научни сознанија развиваат одржливи алтернативни решенија за производство на протеини.
Така, холандскиот стартап „Протеин брувери“ го развива фермотеин, алтернативен извор на протеини, чие производство вклучува одгледување неалергенски култури и печурки со есенцијални аминокиселини и влакна. Овој алтернативен протеин има 10 отсто врзувачки својства на масти и вода, што придонесува за предизвикување на вкусот на месото. Според неговите креатори, фермотеинот им помага на одржливите производители на храна да заштедат време за производство на храната, бидејќи не им е потребна дополнителна обработка за да го приспособат вкусот на крајните производи.
Малезискиот стартап „Енто“ има фарма во Куала Лумпур и одгледува штурци во контролирана средина за да развие хранливи прехранбени производи. Алтернативниот протеин базиран на инсекти нуди повеќе протеини по грам отколку говедското месо и ги содржи сите девет есенцијални аминокиселини.
Лековита храна
Овој термин со понов датум (воспоставен во 1990 година) ја означува храната или нејзините состојки, кои имаат позитивни ефекти врз здравјето на луѓето. Станува збор за додатоци во исхраната, како и за функционална и лековита храна, чие консумирање е и превенција и лек само по себе. Во последниве години интересот за здрава храна е зголемен, а научните истражувања покажаа дека различните хранливи материи имаат превентивен ефект врз појавата на нарушувања поврзани со оксидативниот стрес, како што се алергии, Алцхајмерова болест, дијабетес и имунолошки заболувања.
Американската компанија „Фармхенд органикс“ развива рачно изработена, природно пробиотска, растителна, ферментирана храна од намирници од органско потекло. Тие произведуваат зелка (кисела зелка) и кимчи (туршија), кои овозможуваат подобро варење и зајакнат имунитет.
Безбедност и транспарентност на храната
Денешните клиенти, според различните истражувања, се повнимателни во однос на квалитетот на прехранбените производи што ги купуваат, а сѐ повеќе внимаваат и на безбедноста на храната. Паметните етикети и самостојните уреди за сортирање храна ви овозможуваат да донесувате добри одлуки за купување. Корисен е и системот Интернет оф тингс (IoT), кој овозможува следење на храната во реално време.
„ДисФиш“ е канадски стартап што го развива Тали, софтверско решение за следење морска храна. Собирањето податоци во реално време во одделот за производство на храна се дигитализира, а се користат електронски ваги, печатачи со бар-кодови и скенери. Тали, исто така, им дозволува на производителите на морска храна да објавуваат сертификати за улов и документи за усогласеност. „ДисФиш“, исто така, им помага на производителите со тоа што ги прави поедноставни сите нивни операции, од управување со флотата и истовар на пристаништа до производство и контрола на квалитетот, со што се намалуваат вкупните трошоци.
Персонализирана храна
Истиснувањето на материјалите е најчест начин на печатење на храната, а се користи ласерско и инкџет-печатење, како и методи на биопечатење. Така се развиваат прехранбените производи, а фокусот е на зголемување на квалитетот на производите. Овие 3Д-печатачи за храна обезбедуваат персонализирана исхрана и алтернативни оброци базирани на протеини, како и прецизна исхрана. Исто така, 3Д-печатењето храна ги намалува сложеноста и трошоците за производство на храна.
Зголемената свест на потрошувачите за исхраната ја поттикнува побарувачката за персонализиран избор на исхрана. Ова интересна нова гранка на прехранбената индустрија е предмет на истражување на различни стартапи.
Така, британскиот стартап НГКС обезбедува генетски персонализирани оброци, нудејќи тестови што потрошувачите ги прават дома, а потоа ги користи резултатите од тие тестови за да одреди личен план за исхрана. Компанијата произведува билни шејкови што содржат 30 есенцијални хранливи материи, имаат минимална калориска вредност и низок процент на масти и јаглехидрати.
Интересен е и „Анрич3Д“, сингапурски стартап што обезбедува персонализирана исхрана користејќи 3Д-печатење на храна. Заинтересираните корисници може да направат персонализирани нутриционистички профили на интернет-страницата на „Анрич3Д“ и на тој начин да влијаат на работата на централизираната фабрика за производство на приспособени оброци. Решението за печатење храна на компанијата „Анрич3Д“ им помага на болниците и рестораните да понудат персонализирани програми за оброци засновани на нутритивните потреби и преференциите на поединци.
