Министерот за здравство д-р Венко Филипче, во вечерашното гостување во Дневникот на телевизија Сител потенцираше дека здравствениот систем е целосно спремен за вакцинација и во месец февруари се очекува да пристигнат првите дози од „Фајзер“ и „Ковакс“ механизмот.
– Може да кажам дека по сите три механизми реагиравме и комунициравме навремено и интензивно, најпрво со „Ковакс“, пред некој ден имаше и најава од Светската здравствена организација дека првите дози вакцини може да се очекуваат на оние земји кои се спремни, а ние бевме оценети како едни од најспремните земји во Европа во смисла на тоа вакцините да се пречекаат, складираат, дистрибуираат, а понатаму и да се аплицираат – изјави Филипче.
Во гостувањето на Сител, тој информираше дека пристигнати се фрижидерите кои беа најавувани како донација за фајзеровата вакцина која се чува на -70 степени.
– Два фрижидери се веќе тука, уште три во текот на следните недели. Во еден фрижидер може да се складираат 100 илјади дози на вакцини. Имаме сосем доволен број капацитети и во овој момент – рече Филипче.
Министерот истакна дека добро одат преговорите со компанијата „Фајзер“ и за кратко време договорот ќе биде склучен, резервирани се дозите со таа динамиката како што беше најавено од овој производител.
– Тоа се 5.850 дози во февруари, а по 17.500 во месец март и април. Меѓутоа гледаме дека е тоа едно прашање коешто е на некој начин проблематично за сите земји во Европа. Сите земји и од Европската Унија добија значајно помалку од тоа што беше планирано. Тоа е причината зошто оној трет механизам на солидарност на некој начин доцни, затоа што тие не можат да си дозволат да одделат сега во оваа фаза одредена количина. Поради тоа најавија дека тоа ќе се случи во следните месеци после месец март. Колку за илустрација, од најавените 230 илјади дози на почетокот на годината Австрија добила 23 илјади. Што значи самата компанија „Фајзер“ којашто во овој момент е единствената која има вакцина која е одобрена од двете најголеми регулаторни тела за контрола на лековите европската ЕМА и американската ФДА, има предизвик да ги зголеми своите капацитети. Сега најавија дека малку ќе намалат со цел да ги надградат капацитетите за да испорачаат многу повеќе во текот на цела 2021 година“, посочи Филипче и најави дека во месец февруари ќе пристигнат и вакцините преку „Ковакс“ механизмот, за коишто се направи уплата и се обезбеди соодветна гаранција. Вкупната количина на вакцина преку овој механизам за нашата држава изнесува 833.000 дози.
„Целосно е спремен системот во однос на складирањето, планот на дистрибуција, идентификувањето на критичните групи според приоритет. Направен е планот, тоа се три групи. Во првата група се здравствените работници кои работат со ковид пациенти, вработените во лабораториите кадешто се прави дијагностика, штитениците на домовите за лица со посебни потреби и најстарите лица од возрасните групи над 70 години коишто имаат коморбидитети. Во втората група се останатите здравствените работници, вработени во критична инфраструктура – наставниците, вработените во градинките, новинарите и секако пациентите од другите возрасни групи коишто имаат хронични болести. Целосно се спремни и здравствените домови и Центрите за јавно здравје ширум државата за да ги преземат и аплицираат вакцините по овој редослед“, информираше Филипче.
Филипче: Мерките беа добро димензионирани и дадоа резултат
Министерот за здравство д-р Венко Филипче, во вечерашното гостување во Дневникот на телевизија Сител истакна дека мерките беа добро димензионирани и дадоа резултат, имаме значаен пад на новодијагностицирани случаи и значајно намален број на хоспитализации.
– Мора да се изрази благодарност до граѓаните коишто ги почитуваат превентивните мерки. Навистина немаше значаен број на собири за новогодишните празници. Сега сме во еден период во којшто мора да видиме и процениме што ќе препорачаме понатаму. Мерките зависат од целокупната епидемиолошка состојба. Болниците се навистина подиспразнети. Повеќе од 50% капацитет на болниците ширум државата е празен. За првпат после долг временски период и на самата инфективна клиника има слободни кревети. Од следната недела во функција се враќаат повеќе одделенија – офталмологија, оториноларингологија, започнуваат со редовната работа. Ние сме во една стабилна ситуација, но тоа не значи дека сега ќе станеме помалку внимателни или го спуштаме гардот. Ги следиме бројките на новодијагностицирани, хоспитализирани. Внимателни сме затоа што е можно, како што е тоа случај во други земји да се соочиме со трет бран. Но, засега нема такви сигнали и најави. Навистина е ситуацијата спласната, но апсолутно сме внимателни и внимателно ги анализираме сите епидемиолошки аспекти – рече Филипче.
Во гостувањето, министерот Филипче потенцираше дека во нашата земја досега се детектирани 7- 8 соја на вирусот.
– Направено е генетско секвенционирање во лабораторијата во МАНУ. Од последните летни месеци па навака преовладуваат два соја. Меѓутоа во овој момент се прави генетско секвенционирање и на вирусот од последните две недели за да видиме дали има некаква мутација којашто е можеби слична на онаа којашто ја има во Велика Британија. Оваа недела ќе знаеме дали има некаква дополнителна мутација на овие последни дијагностицирани случаи кај нас во изминатите две недели – изјави Филипче.
