Тетовската полиција поднесе кривична пријава против двајца жители од гостиварското село Форино, на возраст од 61 и 71 година. Лицата се товарат за сторени кривични дела „пустошење на шума“ и „помагање“.
Како што информираат од МВР, во текот на 2017 година второпријавениот, како инвеститор, склучил договор со првопријавениот за правење на пат кон селото, без обезбедено одобрение од јавното претпријатие „Национални шуми“.
По ова, од почетокот на годинава до 31 мај, во атарот на село Форино, на место викано „Форински извори“, на парцели во сопственост на „Национални шуми“, 61-годишникот со работна машина го пробил патот, без потребното одобрение.
Притоа, тој оштетил 86 стебла, односно 15,38 кубни метри црн габер.
Со ова пријавените, на јавното претпријатие „Национални шуми“ му нанеле штета од 118.000 денари.
