Новите станари во Белата куќа се двата германски овчари на Бајден, Мајор и Чемп. Во резиденцијата на американскиот претседател од 2016 година, кога републиканецот Доналд Трамп се всели во неа како претседател, првпат по многу децении се случи да нема миленик. Но семејството Бајден е подготвено да донесе два германски овчари во извршната канцеларија, по инаугурацијата на 20 јануари.
Чемп е подарок од сопругата на Џо Бајден, Џил, кога Бајден беше избран за потпретседател во 2008 година, а Мајор беше посвоен од засолниште за кучиња. Мајор е првото посвоено куче што ќе живее во Белата куќа.
И претседателот Барак Обама имаше миленици за време на својот мандат. Им вети кутре на ќерките Малија и Саша по изборот во 2009 година и го исполни ветувањето со португалското водно куче Бо, кој им е подарок од сенаторот Тед Кенеди. А второто куче Сани, се досели во 2013 година.
Претседателот Џорџ Буш, пак, имаше два шкотски териери, Барни и Мис Бизли. Видеата од „Барниекам“, снимени од камера околу вратот на Барни и објавени на официјалната веб-страница на Белата куќа, станаа популарна божиќна традиција. Ривалството меѓу чоколадниот лабрадор Бади на Бил Клинтон и мачката Сокс е овековечено во детската книга од првата дама, Хилари Клинтон. Омиленото куче на Линдон Б. Џонсон, Јуки, беше од мешана раса и беше пронајдено од ќерката на Џонсон, Луси, на бензинска пумпа во Тексас. Познати по нејзиното пеење, Јуки и Џонсон правеа заедно сè, од присуство на состаноци во кабинетот до пливање, па дури и танцување.
Саканиот шкотски териер Фала на Френклин Д. Рузвелт постојано беше покрај својот господар, дури и го придружуваше во странство. Фала е единствениот „прв миленик“ што бил овековечен во форма на статуа во претседателскиот меморијал. Советскиот премиер Никита Хрушчов им подари куче на Џон Кенеди и на неговото семејство. Пушинка, што значи „меко“, беше ќерка на Стрелка, првото руско куче во вселената.
