Здружението ГСМА го објави својот извештај за мобилна интернет-конекција за 2023 година, во кој се наведува дека 55 отсто од светското население или околу 4,3 милијарди луѓе денес користат мобилни телефони.
Според податоците објавени во извештајот, 4,6 милијарди луѓе во светот користат интернет, а 4 милијарди пристапуваат до услуги преку паметни телефони.
Извештајот на ГСМА откри нееднаквост меѓу регионите и нивниот пристап до мобилен интернет. Околу 69 отсто од корисниците на паметни телефони што живеат во Северна Америка, Источна Азија и регионот на Пацификот користат 4Г-уреди, додека поголемиот дел корисници во Супсахарска Африка сè уште се потпираат на 3Г-конекции, слично на Блискиот Исток и Северна Африка, каде што секој трет мобилен телефон сè уште користи 3Г-интернет.
Растот на користењето на мобилниот интернет не е изненадување, но околу 3,4 милијарди луѓе сè уште немаат пристап до интернет. ГСМА тврди дека глобалниот број на луѓе што живеат во области со мобилна мрежа и не ја користат е 38 проценти. Јазот во поврзувањето е впечатлив во Супсахарска Африка и Јужна Азија со 59 и 52 отсто од населението што не се поврзани на интернет.
Друга важна информација во извештајот е дека 600 милиони луѓе, или околу 8 отсто од светската популација, сè уште користат интернет преку т.н. телефон со функции, односно тип на мобилен телефон што ја задржал формата на претходните генерации, вклучувајќи мали екрани и физички копчиња. Други бариери за понатамошно проширување на мобилните корисници се дигиталните вештини, писменоста, безбедносните грижи и достапноста на релевантна содржина. Сето тоа ги спречува корисниците на паметни телефони целосно да ги користат своите уреди за пристап до интернет.
Генералниот директор на ГСМА, Матс Гранрид, рече дека недостигот од поврзување им оневозможува на милијарди луѓе пристап до витални услуги и можности за приход, што несразмерно влијае на посиромашните, помалку образованите, руралните и женските корисници. Овие групи дополнително ќе бидат погодени од кризата на трошоците за живот и зголемувањето на итни случаи предизвикани од климатските промени, а Гранрид повика на забрзување на дигиталното вклучување и уривање на бариерите за да се запре проширувањето на дигиталниот јаз.
