Исклучително важна студија за пациенти со рак
Вежбањето кај пациенти со рак може да го намали ризикот од смрт за дури една третина, да ја намали можноста за повторна појава на тумор и генерално е поефикасно од многу лекови, според резултатите од студијата што би можела целосно да ги промени сегашните здравствени упатства. Лекарите со децении препорачуваат усвојување здрав начин на живот за да се намали ризикот од добивање рак. Сепак, досега имало малку докази за влијанието на вежбањето врз периодот по дијагнозата и не се зборувало многу за тоа.
Нова студија во која учествувале пациенти од САД, Велика Британија, Австралија, Франција, Канада и од Израел покажала дека структурираниот режим на вежбање по третманот може драматично да го намали ризикот од смрт, повторна појава на болеста или развој на нов рак. Резултатите од студијата беа презентирани во Чикаго на годишниот состанок на Американското друштво за клиничка онкологија. За првпат во историјата на медицината, постојат јасни докази дека вежбањето е уште подобро во спречувањето на повторна појава на рак и смрт отколку многу од лековите што моментално им се пропишуваат на пациентите, изјави еден од водечките светски експерти за рак.
Д-р Џули Гралоу, главен медицински службеник на Asco, која не била вклучена во истражувањето, изјавила дека новите докази би можеле да доведат до „голем напредок во разбирањето на важноста на поттикнувањето на физичката активност за време и по третманот“. Пациентите што започнале структуриран режим на вежбање со помош на личен тренер или здравствен советник по третманот имале 37 проценти помал ризик од смрт и 28 проценти помал ризик од повторна појава или развој на нови видови рак, во споредба со пациентите што го следеле советот на својот лекар, но не вежбале. Гралоу рече дека прво ја нарекле студијата „Добра како лек“, но подоцна ја преименувале во „Подобра од лек“ бидејќи, за разлика од многу лекови за рак, нема несакани ефекти.
– Вежбањето е исто толку корисно како и многу лекови – 28 проценти помал ризик од повторна појава на болеста и 37 проценти помал ризик од смрт. Одобрените лекови често имаат полоши резултати и се скапи и токсични. Кога почнав да работам во онкологија пред три децении, сè уште бевме нежни со пациентите и им велевме да не претеруваат со вежбањето додека се подложени на хемотерапија. Но сега го сменивме тоа. Би рекол дека вежбањето е дури и подобро од лекот – рече докторот.
Студијата опфати 889 пациенти со рак на дебело црево помеѓу 2009 и 2023 година.
Дури 90 проценти од нив имале трета фаза од болеста. Пациентите биле случајно распределени во група што учествувала во структурирана програма за вежбање (445 од нив) и во група што добила само брошура со совети за здрав начин на живот (444 од нив). Пациентите што вежбале работеле со личен тренер двапати месечно на почетокот, а подоцна еднаш месечно во период од три години. Нивниот тренинг бил еквивалентен на три-четири прошетки помеѓу 45 и 60 минути, но самите пациенти можеле да изберат како да додадат дополнителни активности во својот распоред, па некои дури и оделе на кајак или скијање. По пет години, пациентите во групата за вежбање имале 28 проценти помал ризик од повторна појава на болеста или развој на нови видови рак во споредба со оние во другата група. По осум години, истите пациенти имале 37 проценти помал ризик од смрт во споредба со пациентите што не вежбале.
