„Тајм аут“ состави листа на најдобрите божиќни пазари, кои не се само места каде што можете да уживате со варено вино туку и вистински мали оази каде што се случуваат празнични чуда.
Стразбур, Франција
Во Стразбур се наоѓа најстариот божиќен пазар во Франција, кој постои од 1570 година. Два милиони туристи одат во овој град секоја година, и тоа со добра причина. Но не е само божиќниот пазар она што вреди да се истражува – областа околу катедралата се трансформира во блескава земја на чудата секоја година, што го прави ова место чудесно и полно со подароци, грицки и треперливи светилки. Не е ни чудо што Стразбур е познат како главниот град на Божиќ. Од тука практично можеме да го мириснеме циметот.
Нирнберг, Германија
Не постои единствена причина зошто толку многу луѓе се собираат на божиќниот пазар во Нирнберг за време на празничната сезона. Секако, „Кристкајнд“ е навистина нешто спектакуларно, а амбиентот под раскошната кула на фонтаната „Шене Брунен“ од 14 век е волшебен. Но сето тоа е бледо во споредба со самиот пазар, мини-град со дрвени тезги полни со традиционални локални производи и чаши домашно вино.
Клисурата Равена, Германија
Под сводовите високи 40 метри на огромниот железнички мост во германската област Шварцвалд се наоѓа празничниот пазар во клисурата Равена, кошница од колиби и необични божиќни светилки што често се покриени со дебел слој снег. За уште поубави глетки, посетете го навечер кога целиот мост е осветлен во темноцрвена боја.
Виена, Австрија
Кога станува збор за божиќните пазари, сите се согласуваат дека оној во Виена е најголемиот и најубав. Австрискиот главен град може да се пофали со еден од најголемите божиќни пазари на планетата. „Божиќниот свет“ има над сто висококвалитетни тезги и едноставно ги внесува посетителите во празнично расположение.
Единбург, Велика Британија
Зимскиот фестивал во Единбург е исто толку голем и полн со настани, како и неговите легендарни новогодишни прослави. Се протега сè од градината „Ист принцес стрит гарденс“ до Ројал Мајл, а празничната екстраваганција вклучува лизгање на мраз, продавници за занаети, продавачи на вкусна храна и секако многу тезги со виски.
Валкенбург, Холандија
Некои од пештерите на Валкенбург се стари речиси колку и самиот Божиќ: подземниот систем во југоисточна Холандија првично бил ископан од Римјаните пред речиси 2.000 години. За време на Божиќ, неколку избрани пештери во Валкенбург блескаат со празнични светла. Поради тоа и важи за еден од најмагичните божиќни пазари во светот. Ако треба да изберете само една пештера, одете во општинската пештера.
Келн, Германија
Божиќните пазари во Келн секоја година привлекуваат неверојатни четири милиони посетители. Додека пазарот пред катедралата е најпознат, целиот центар на градот е преполн со пазари со различни теми, секој е полн со кулинарски специјалитети и локални ракотворби.
Бирмингем, Велика Британија
Божиќниот пазар во Бирмингем се смета за најголемиот автентичен божиќен пазар надвор од Германија или Австрија. Пробајте ѓевреци, колбаси, варено вино, пиво или топло чоколадо, додека ги разгледувате рачно изработените дрвени украси и стаклените топки за украсување на елката.
Севилја, Шпанија
За оние од постудените места, има нешто малку надреално во лизгањето под палми на не многу ниска температура. Но тоа не е сè што добивате на божиќниот пазар во Севилја – тој е исто така познат по својата музика во живо и типичните андалузиски ракотворби.
